Prezidente CVTL, Madalena Hanjam, ho nia ekipa hala’o enkontru ho Prezidente Repúblika, Francisco Guterres Lú Olo. Imajen Mídia PR

DILI, (TATOLI)— Prezidente Repúblika, Francisco Guterres Lú Olo, disponivel atu sai membru onoráriu ba Cruz Vermelha Timor-Leste (CVTL) no sei fó apoiu ba atividade sira hanesan kampaña doasaun ran no prevensaun dengue.

Ekipa CVTL hasai foto hamutuk ho Prezidente Repúblika, Francisco Guterres Lú Olo, hafoin enkontru ramata. Imajen Mídia PR

Xefe Estadu hato’o disponibilidade ne’e hafoin enkontru ho ekipa CVTL, sesta ne’e, iha ne’ebé ekipa refere husu Xefe Estadu nia disponibilidade atu bele sai membru onoráriu no husu apoiu ba atividade CVTL nian hanesan partisipa kampaña doasaun ran no prevensaun dengue.

Prezidente Repúblika dehan atividade CVTL nian ne’e tenke la’o nafatin ba oin, kooperasaun ho Estadu no hatutan katak bainhira atu kombate dengue presiza defini polítika di’ak ho asaun integradu atu bele kombate.

Ba doasaun ran, tuir Lú Olo, ne’e importante tebes hanesan forma ida atu sustenta no rezerva ran ba ema moras sira iha ospitál.

Aleinde ne’e, ekipa CVTL mós husu Prezidente Repúblika nia apoiu hodi ko’alia ho Primeiru-Ministru ba dekretu lei CVTL nian ne’ebé maka husu ba Governu atu iha dotasaun diretu ba CVTL.

“Prezidente Repúblika apresia serbisu sira ne’ebé maka Cruz Vermella Timor-Leste hala’o, liu-liu asaun umanitária sira ne’ebé liga diretamente ba povu nia nesesidade”, Prezidente CVTL, Madalena Hanjam, ba jornalista sira iha Palásiu Prezidente Nicolau Lobato, Bairru Pité, hafoin soru-mutu ho Xefe Estadu, Lú Olo.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here