DILI, (TATOLI) – Governu Timor-Leste, liuhusi Sekretariu Estadu Komunikasaun Sosiál (SEKOMS) buka posibilidade atu koopera ho ajénsia notisioza Portugal, Lusa, hodi reforsa ajénsia notisioza Estadu Timor-Leste, Tatoli.

Tanba ne’e, sekretáriu estadu komunikasaun sosiál, Merício Juvinal dos Reis Akara, konvida reprezentante ajénsia Lusa iha Timor-Leste, Jornalista António Sampaio, hodi komunika no troka ideia ba malu.

“Depois fó pose ba prezidente Tatoli ho vise-prezidente rua, ita tuur hamutuk haree keta iha formasaun ruma. Formasaun ami hanoin importante”, informa sekretáriu estadu, Merício Akara ba jornalista sira, iha Palásiu Governu, ohin.

Merício Akara informa mós katak nia bolu ajénsia Lusa hodi troka ideia, hanesan analiza situasaun, realidade kona-ba Tatoli nomós buka rona esplikasaun kona-ba esperiénsia ajénsia Lusa nian oinsá sira hala’o kna’ar no serbisu.

“Ami iha hanoin ida katak presiza kontinua komunikasaun sira hanesan ne’e para ita haree to’ok posibilidade atu halo kooperasaun, tanba haree ba estatuta, ajénsia rua ne’e kuaze hanesan; ajénsia estadu nian”.

Merício Akara konsidera Ajénsia Lusa nia ezistensia kle’ur ona no iha esperiénsia barak enkuantu Tatoli sei foun, tanba ne’e buka aprende, atu dezenvolve Ajénsia Tatoli sai kualidade, profisionalizmu hodi serbí nasaun no sai referénsia.

Sekretáriu estadu mós esklarese, tanba ajénsia Tatoli ne’e foun, nune’e diskute hodi haree didi’ak mós nia jestaun  hodi sai ajénsia ida profisionál, hamriik forte, integridade no kompetente hodi kompete mós ho ajénsia sira seluk.

Ajénsia Tatoli la’ós hanesan mídia baibain. Nia pozisaun hanesan ho Lusa, Antara, Bernama no ajénsia internasionál sira seluk tan, tanba ne’e prepara án, bolu hodi husu mós posiblidade Lusa nian hodi fortalese Tatoli.

Tatoli ne’e ajénsia joven ida, Lusa iha ona esperiénsia balun, iha mós esperiénsia iha Timor-Leste. Ida ne’e tenke serbisu maka’as, tenke iha kualidade, kapasidade, kompeténsia.

Nune’e SEKOMS husu hanoin ho ajénsia sira ne’ebé iha esperiénsia, hodi apoiu, fasilita formasaun, hodi Tatoli bele prodús informasaun ho padraun nasionál nomós internasionál, tanba Tatoli la’os konsumu de’it rai laran maibé mós internasionál.

“Tanba ne’e, tékniku no jestaun importante. Nune’e mós, ami ko’alia atu haree iha kapasidade, kompeténsia para nune’e ita halo notísia no vídio ne’ebé di’ak para nune’e ita mós hahú fali fa’an ba ajénsia internasionál sira, para aban bainrua Tatoli iha fali rendimentu rasik”.

Nia mós akresenta, Tatoli sei sai ajente ba produsaun notísia ho nível alta, rigór no analítiku, fotografia no vídio kualidade aas liu, ho profesionál ne’ebé iha koñesimentu di’ak, kapasidade no kompeténsia linguístika hanesan tetun padraun, portugés no inglés aas, hodi komunidade internasionál no nasionál bele uza Tatoli hanesan referénsia.

Prodús notísia ne’ebé mak di’ak para ajénsia internasionál sira bele hola. Fotografia di’ak, filmajen di’ak kona-ba ita-nia rain, asuntu balun importante, ema bele hola i bele sai rendimentu fali ba Ajénsia Tatoli.

“Tanba ne’e mak ita la’ós tuur de’it hetan kedas, maibé hahú husi formasaun, tenke sériu, apoia téknika mós tenke maka’as, treinu para oinsa sai editór di’ak ba língua portugeza, inglés, tetun. Nia tenke sai referénsia prinsipál ba mídia sira seluk. Tanba ne’e ajénsia estadu nian”.

Kona-ba tomada prezidente Tatoli nian, givernante ne’e katak hein promulgasaun orsamentu husi Prezidente Repúblika. Tanba, oras ne’e dadaun orsamentu iha  hela prezidente.

“Kuandu Prezidente Repúblika promulga, ita planu tomada de posse. Ne’ebé, ita hein prezidente promulga” garante sekretáriu estadu komunikasaun sosiál, Merício Juvinal dos Reis “Akara”.

Iha fatin hanesan, reprezentante Lusa, jornalista António Sampaio haktuir katak antes ne’e governu Timor-Leste tenta Lusa hodi apoiu ruma ba ajénsia Tatoli no SEKOMS ko’alia fila fali asuntu ne’e no Lusa disponível haree oinsa mak ita bele koopera hodi fortalese Tatoli.

“Ha’u hanoin katak importante Timor ne’e mídia forte, Tatoli nu’udar ajénsia primeira Timor nian, purtantu presiza mós forte atu bele serbisu. Esensialmente mak ida ne’e”, akresenta jornalista António Sampaio.

Nia mós haktuir, Lusa la ko’alia saida mak governu hakarak, maibé durante sorumutu partilla hanoin hodi haree nesesidade saida mak bele ajuda ba malu, haree ba nesesidade, vontade no objetivu Tatoli nian.

“Depois Lusa nian, ha’u sei ko’alia ho Diresaun, Konsellu Administrasaun no haree aranja forma ruma hodi kolabora. Iha área barak hodi haree, kooperasaun, formasaun, asisténsia téknika hodi ajuda monta; buat hotu depende vontade governu timoroan sira nian”, informa jornalista Ajénsia Lusa ne’e.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here