Diretór Sacoms Enerjia, Abílio Araújo bainhira dada lia ho primeiru-Ministru, Taur Matan Ruak. Imajen Media GPM

DILI (TATOLI) – Diretór SACOMS Enerjia, Abílio Araújo informa nia prezensa iha Palásiu governu ohin, la’ós ema polítiku, maibé hanesan emprezáriu, ne’ebé promete kontinua fornese mina ba Betanu, mezmu to’o agora governu seidauk halo pagamentu.

“Ha’u esklarese katak ami defaktu la’ós lakohi fornese mina, foin lalais ne’e semana kotuk ami nia ró lori mina hodi ba enxe iha Betanu. Hafoin esplika mós katak iha tinan ne’e nia laran, mina ne’ebé mak SACOMS Enerjia fornese dezde Dezembru tinan uluk, ne’ebé korrespondente ba tinan ida ne’e, ami nunka hetan pagamentu, liu-liu iha rejime duodecimo sira ne’ebé iha ne’e nunka ami benefisia, ne’e mak hau esklarese no Primeiru-Ministru (PM), Taur Matan Ruak (TMR) rasik dehan katak nia lahatene ida ne’e”, Abílio Araujo informa ba jornalista sira iha Palásiu Governu hafoin hasoru malu ho Xefe Governu, Kinta ne’e.

Biban ne’e, nia mós lori reprezentante husi kompañia TRAFIGURA, ne’ebé hanesan SACOMS Enerjia ninia parseiru hodi ko’alia ho Primeiru Ministru konaba investimentu ne’ebé halo ona nó mós ba investimentu sira ne’ebé prontu atu hala’o iha tempu badak.

“Ami mós ko’alia konaba investimentu, ha’u lori TRAVIGURA ne’ebé ami nia joint venture dezde tinan 2014, atu fornese mina iha Hera no Betanu. Nia hanesan parseiru ida ne’ebé mak boot liu iha mundu. Tanba ne’e mak ha’u mai aprezenta ba Primeiru-Ministru no nia kontente, hein iha futuru bele ko’alia ho autoridade ita nia konaba mina no investimentu sira iha rai liur”, Nia esplika tan.

Nu’udar emprezáriu nia hein atu Prezidente Repúblika (PR) atu promulga Orsamentu Jerál Estadu (OJE) 2018 no nia fiar Xefe Estadu sei promulga.

“Ita nia ekonomia iha rai laran komesa book an no espera ita nia rai bele la’o ba oin. Ba ha’u tempu kampaña nia remata no governu iha ona, ha’u hanesan emprezáriu no ha’u ho ha’u nia empreza sira servisu ho governu”, tenik.

Hodi hatutan: “Uluk ha’u dehan ona katak dezde primeiru governu to’o governu atuál ha’u servisu ho governu sira no tempu kampaña remata ona, agora tenke prepara an atu servisu, ida ne’e mak ami nia esforsu no hakarak”.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here