Ministériu Finansas (MF) no Komisaun Funsaun Públika (KFP) asina dokumentu User Requirement Document (URD).

DILI, (TATOLI) – Ministériu Finansas (MF) no Komisaun Funsaun Públika (KFP) asina ona dokumentu User Requirement Document (URD) hodi inisia prosesu servisu tékniku no preparativu sira antes lansamentu “go live” iha janeiru 2019, kona-ba interligasaun entre sistema Government Resource Planning (GRP) husi MF ho Sistema Integradu Jestaun Administrasaun Públika (SIGAP-sigla iha portugés) husi KFP.

Prezidente KFP, Faustino Cardoso, hatete ida ne’e pasu ida atu hatán ba ezijénsia reforma administrasaun públika liuliu oinsá atu asegura automatizasaun sistema verasidade funsionamentu sistema efikásia no efisiénsia serbisu ligadu ho pagamentu ba funsionáriu sira, ajente administrasaun públika iha funsaun públika nia laran.

“Ida ne’e atu hatán ba preokupasaun sira ne’ebé durante ne’e ita rona, observa, hatene kona-ba duplikasaun dadus funsionáriu ne’ebé ema balun hanaran funsionáriu matebian, mate ona, maibé sei simu nafatin saláriu ou funsionáriu ida simu saláriu dupla”, Faustino afirma iha serimónia asinatura URD, iha salaun Aikurus-Binani, Matadouru, ohin.

Nia hatutan: “Ho asinatura dokumentu ida ne’e hatudu kompromisu Estadu nian liuliu Ministériu Finansa no Komisaun Funsaun Públika ho apoiu, kolaborasaun másima husi instituisaun hotu hahú kedan husi DJ (diretór jerál), jestór rekursu umanu sira, atu oinsá bá oin servisu hamutuk iha ámbitu asegura efikásia, efetividade serbisu iha interligasaun ida ne’e”.

Nia realsa MF no KFP konsege hetan entendimentu konjuntu kona-ba konteúdu saida de’it mak presiza atu hatuur iha dokumentu no sai nu’udar baze ba konsolidasaun sistema interligasaun ne’e rasik.

“Faze ida ne’ebé lafasil, tanba lori tempu naruk, kompromisu ba interligasaun dezde uluk Governu sira anteriór, maibé foin ba dala-ida ne’e ita to’o iha pasu atu konkretiza mehi sira uluk ne’e”, katak tan.

Tuir nia: “Ne’e maka natureza administrasaun públika. Dalabarak ita mehi aas, maibé mós tenke realístiku ho nia evolusaun, maibé prinsípiu kontinuidade sai nu’udar baze fundamentál no ohin manifesta prinsípiu ida ne’e no bá oin nafatin”.

Faustino dehan validasaun dadus nu’udar aposta prinsipál ne’ebé durante ne’e buka atu kumpre tuir.

“Ami akompaña, observa iha duni vontade, kolaborasaun di’ak husi liña interministeriál, ajénsia autónoma iha ámbitu ida ne’e. Etapa foun ida foin hahú, ne’ebé ejize nafatin ita-nia vontade, kolaborasaun di’ak hodi ikus mai tuir kalendáriu ne’ebé iha, 7 janeiru 2019 sistema interligasaun ne’e sei go live katak sei halo lansamentu no hahú husi ne’ebá prosesu tomak sei la’o tuir sistema automatizasaun nune’e hadook ona husi preokupasaun ne’ebé maka ita iha”.

Xefe Unidade Sistema Intergradu Informasaun Jestaun Finanseira, Joanico Pinto, esplika iha dokumentu URD ne’e define tarrefa serbsiu entre KFP no MF atu halo cleans up, dadus rekonsiliasaun entre baze dadus SIGAP ho MF para bele realiza interligasaun ne’e.

“Entaun iha laran ne’e define komponente rua, ida kona-ba tarrefa serbisu parte rua no seluk kona-ba nesesidade saida mak sistema rua ne’e bele komunika ba malu”.

Vantazen husi aplikasaun sistema interligasaun no automatizasaun ne’e mak sei laiha ona duplikasaun dadus ba funsionáriu públiku nian, laiha tan funsionáriu mate klamar, tanba konsege hamoos hotu ona husi sistema rua GRP no SIGAP ne’ebé ko’alia ba malu, informasaun payroll no pagamentu sei prosesa tuir nia tempu ne’ebé loloos no rigór, repozitóriu dadus funsionáriu públiku permantene no ajente administrasaun públika sei sentraliza iha KFP no dadus sei sinkroniza entre KFP no MF.

Vantazen seluk mós mak rekolla manutensaun informasaun ba funsaun públika sei haktuir ba KFP hodi garante katak laiha dupplikasaun dadus entre sistema SIGAP no GRP, informasaun funsaun públika sei iha tempu reál no atualiza nafatin, informasaun funsaun públika sei transparénsia no rigór no odamatan únika, simplifika no fasilita prosesu kontrolu ba númeru funsionáriu públiku permanente no ajente administrasaun.

Joanico salienta sobre funsionáriu mate klamr ne’ebé durante ema kestiona, husi pontu MF laaseita, tanba tenke refere ba dadus. “Tuir ami dadus ne’e mak seidauk sinkroniza, tanba ne’e mak ita halo ida ne’e para unifika dadus ne’e”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here