DILI, (TATOLI) – Instituisaun akadémika privada, Universidade Dili (UNDIL) kompromete sei sai sentru ba talentu no exelénsia hodi prodús talentu.

Reitór interinu UNDIL, Francisco Martins, hateten UNDIL universidade ne’ebé ki’ik maibé bonita, tan iha sidade nia fuan no la’ós ne’e de’it, maibé universidade privada uluk no boot iha Timor-Leste.

“La’ós boot iha nia naran de’it, Universidade Dili sai hanesan fatin atu kria oportunidade ba nia estudante sira”, katak Francisco Martins perante estudante sekundáriu no universitáriu sira iha Kampus Mascarenhas, ohin.

Vise-reitór I ne’e akresenta UNDIL sei fó apoiu estudante sira nian hanoin hodi kria, organiza atividade sira hodi promove, hasa’e, hatudu no motiva liután estudante sira.

Nia haklaken timoroan hotu tenke iha espíritu atu serbí, serbisu no la’o ba oin. “Ita la iha tan razaun atu ta’uk, la iha tan razaun dehan la bele, tenke hakat ba oin”, apela akadémiku UNDIL ne’e.

Francisco Martins afirma UNDIL nu’udar universidade ne’ebé mak halo abnegasaun (pengabdian), katak nakonu ho nasionalista.

“Nasionalizmu de’it la to’o, talentu de’it la to’o. Tenke kompeténsia, tanba agora ita hotu hatene katak universidade hothotu tenke kumpre tuir, padraun, kritériu ne’ebé atu sai universidade ne’ebé mak kualidade”.

Akadémiku universidade privada ne’e mós kompromete universidade sei kria regra atu bele hala’o atividade sira hodi promove talentu no kreatividade, inklui inovasaun sira.

“Ba oin, UNDIL sei halo feira ida boot liutan, ita bolu dehan feira de carreira. Ita sei lori merkadu mai universidade. Maibé ita iha regra, planu ita sei haree didi’ak”, konklui.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here