Estudante Komunikasaun Sosiál, UNTL (Universidade Nasionál Timor Lorosa’e), Nilton das Dores Pereira ne’ebé sai ‘Primeiru-Lugar’ kompetisaun “Grande Finál” Produz Filme Badak.

DILI, (TATOLI) – Estudante Komunikasaun Sosiál, Universidade Nasionál Timor Lorosa’e (UNTL), Nilton das Dores Pereira, sai Primeiru-Lugar ba kompetisaun Grande Finál prodús Filme Badak, 365 Stories: Digital Storytelling Network, iha Jakarta, Indonézia, reprezenta Timor-Leste (TL).

Títulu filme ne’ebé nia prodús mak ho tópiku Toleránsia Relijiaun no filme ne’e mak lori nia sai vensedór ba konkorente sira seluk iha Indonézia.

“Vensedór primeiru nia filme, vizualmente di’ak no nia istória forte. Nia mak Nilton, husi Timor-Leste”, anunsia juri Sebastian Partogy, Reporter Jakarta Post, reprezentante ekipa juri perante audiénsia iha podium AtAmerica, Jakarta-Indonézia, kinta loronkraik (20/9).

Iha prosesu avaliasaun, juri Aurelia Agustine, hateten nia parte aprende buat barak ho filme badak ne’ebé Nilton Pereira prodús kona-ba toleránsia entre relijiaun iha TL.

Nune’e mós, juri Sebastian Partogy, akresenta hanesan jornalista ida, liuhusi Nilton Pereira nia filme badak ne’e bele sai hanesan buat ida ne’ebé presiza tebes, liliu promove valór pozitivu sira.

Enkuantu, juri Scott Hartman, ho dalen tetun manifesta katak gosta loos filme Nilton Pereira ninian tanba iha filme ne’e estudante komunikasaun sosiál UNTL ne’e entrevista mós lider relijiozu sira hanesan lider musulmanu nomós katóliku.

Liuhosi transmisaun pájina AtAmerica ne’ebé Tatoli asesu, perante públiku no juri sira, estudante finalista ne’e esplika filme kona-ba Toleránsia Relijiaun tan konsidera iha nasaun balun iha mundu la kle’ur rona ema sunu igreja, meskita no seluk tan, maibé iha TL povu sira moris iha vida armonia nia laran.

“Ha’u haree iha mundu ne’e, iha nasaun balun konflitu entre relijiaun ne’e boot tebes até iha asaun anarkismu hanesan sunu igreja, sunu meskita. Maibé iha ha’u-nia nasaun (Timor-Leste), populasaun maioria ho relijiaun katóliku no musulmanu ne’e minoria. Iha ha’u-nia video ne’e ezemplu toleránsia iha ha’u-nia nasaun”, esplika konkorente.

Iha fatin hanesan, hafoin pronunsia rezultadu finál, Scott Hartman, regional public engagement especial Estadu Unidu Amérika (EUA) iha Jakarta, agradese no apresia konkorente sira ne’ebé tuir ona kompetisaun. “Ha’u kongratula konkorente sira hotu”.

Antes ne’e, molok dezloka, ba Tatoli, Nilton Pereira akresenta kontente bainhira fó sai rezultadu entre konkorente na’in 16, nia mak eskollidu hodi reprezenta Timor-Leste, hodi ba Jakarta.

“Ha’u sente kontente ho rezultadu ne’e. La’ós kontente de’it, maibé valór pozitivu ne’ebé ha’u foti husi rezultadu mak inspirasaun no motivasaun mai ha’u atu bele kontinua aprende liutan iha área filme, liuliu filme dokumentáriu”.

Nia haktuir intensaun durante iha nia prosesu estudu la’ós atu halo kompetisaun hodi buka manan ka lakon maibé importante mak aprende hodi esplora kualidade pesoál, buka deskobre talentu no kapasidade teóriku no tékniku.

“Kompetisaun ne’e sai hanesan sasukat kapasidade ida mai ha’u-nia kapasidade iha área filme dokumentáriu”, hateten vensedór ba kompetisaun ho tópiku: 365 Stories Digital: Story Telling Network Competition 2018, organiza husi Uma Amérika, iha Dili.

Nia haktuir maske ho limitasaun iha prosesu produsaun filme maibé bele hetan esperiénsia lubuk ida, tanba konsege aplika téoria kona-ba área komunikasaun sosiál nian ba prátika no hatudu rezultadu inklui hetan apresiasaun di’ak husi públiku.

“Ita halo filme dokumentáriu tenke pasiénsia”, subliña Nilton ne’ebé moris iha Same-Maunfahe, loron 3 setembru 1993 ho fitun eh zodiaku Virgo, ne’ebé iha preferénsia ka hobby fotografia no filmajen ne’e.

Fuan domin Arlindo Pereira (Agrikultór) no Virgilia da Costa Baptista (Profesora) husi uma lisan Uma Lia Na’in ho Uma Lor no Uma Hataru no Uma Korik ne’e haktuir nia kronolojia estudu katak nia tama UNTL, liu departamentu Komunikasaun Sosiál iha 2013.

Antes ne’e, sekundáriu iha Colégio São José Balide (2009), Pré-sekundária iha Eskola Katólika São Miguel Arcanjo Same (2005), Primária Katólika São Miguel Arcanjo Same (1999) no Infantil mós iha São Miguel Arcanjo Same (1999).

Alin husi Miguel Arcanjo Migy (matebian) no maun husi Jesuinha Baptista Pereira (Noi), Ambrosio Pereira (Ajiu), Cesarinho Baptista Pereira-Aja (matebian), Celajinho da Conceição Baptista Pereira Cesar (matebian) ne’e haktuir iha perkursu edukasaun ne’e no vida hasoru mós “laloran moris” maske nune’e ho pasiénsia korajen no metin iha fé, hodi hasoru laloran ne’e basá iha universidade hela dook husi inan-aman, tan inan-aman iha foho.

Katak, susesu iha ita-nia estudu mak tenke mai husi ita-nia hakarak rasik no sentimentu domin nomós komprometidu iha ba área ne’e, labele haksoit ba haksoit. Nune’e mós tenke iha vontade, badinas buka aprende, labele hein de’it husi dosente sira.

“Buka rasik! Agora dadaun ne’e mundu dijitál; iha internet buat hotu iha, depende ita uza. Aproveita buat sira ne’e hodi eleva ita-nia kapasidade iha área ne’ebé mak ita foti”, estudante DKS ho karakteristika isin-mutin morena ho estilu preferénsia ala kribo ne’e fó hanoin.

Entretantu, iha kompetisaun ne’e, segundu lugar mak Hari Obbie Darmawan, husi Universitas Muhamadya Malang, ho tema vídio mak diversidade kulturál no terseiru lugár ba kompetisaun ne’e mak konkorente Setfian Lutfy ho tema vídio mak diversidade mós.

Ekipa juri ba kompetisaun ne’e mak Reporter Jakarta Post, Sebastian Partogy, Scott Hartman, regional public engagement especial, embaixada EUA iha Jakarta nomós Aurelia Agustine, sosiál mídia specialist, embaixada EUA iha Jakarta.

Video relevante; https://web.facebook.com/atamerica/videos/1395027227298778/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here