Estrutura Konsellu Imprensa ne'ebé kompostu husi Konselleiru sira, Diretora ezekutiva no Diretór Kooperasaun Institusionál hala'o audiénsia ho Primeiru-Ministru iha Palásiu Governu. Imajen Mídia GPM

DILI, (TATOLI) – Prezidente Konsellu Imprensa, Virgílio da Silva Guterres, ho ninia estrutura halo audiénsia ho Primeiru-Ministru (PM), Taur Matan Ruak, hodi hato’o hanoin no preokupasaun balun, liu-liu relasiona ho direitu hatan membru governu sira kuandu mosu publikasaun iha mídia.

“Konsellu Imprensa (KI) enkoraja no husu ba Primeiru-Ministru atu komunika no enkoraza membru governu sira atu uza sira nia direitu resposta bainhira iha mídia nia publikasaun ne’ebé mak la loos tuir sira nia deklarasaun, entaun sira labele nonok no tenke hato’o”, tenik ba jornalista sira hafoin hasoru malu ho Xefe Ezekutivu iha Palásiu Governu, kinta ne’e.

Nia dehan direitu resposta ba publikasaun mídia ne’ebé la tuir fonte nia deklarasaun, hanesan meiu ida atu kontribui hadi’a ba kobertura ne’ebé ho kualidade husi mídia sira.

Nia mós rekoñese dezafíu ne’ebé durante ne’e KI infrenta mak auzénsia kuadru legál ne’ebé mak orgaun reguladór mídia presiza, hanesan Lei Radiudifuzaun no kuadru legál konaba asesu informasaun (Freedom of information art).

Kona-ba kuadru legál sira, PM nia sujestaun atu KI iha kontaktu ho Ministériu Reforma Lejislativa no Asuntu Parlamentár (MRLAP) nomós Sekretariadu Estadu Komunikasaun Sosiál (SEKOMS) atu haree hamutuk oinsá hamosu esbosu ba kuadru legál sira ne’e.

Biban ne’e, ekipa KI mós fó hatene, liu-liu relasiona ho mandatu KI nia ne’ebé mak atribuisaun karteira professionál ba jornalista sira.

“Ida ne’e ami informa, maske lei fó kompeténsia ba KI atu hamosu dokumentu ka kuadru legál provizóriu ida hodi hein dekretu governu ne’e sai”, ketak.

Planu KI ba tinan 2019 mak tanba KI lansa ona prémiu jornalismu ba kategoria no loke ona ba profisionál sira atu aplika, entaun oinsá atu hetan orsamentu ne’ebé mak bele apoia.

“Hein katak orsamentu sei iha, nune’e Konsellu Imprensa bele implementa ona ba dahuluk, atribuisaun prémiu ba kategoria haat ka lima ba prémiu jornalizmu nian. Objektivu mak hakarak enkoraza profisionál sira atu hadi’a sira nia servisu”, katak.

Nia mós informa kona-ba mídia nia, PM nia preokupasaun barak liu iha sosiál mídia, oinsá rádiu no televizaun sira bele aprezenta sira nia án diferente liu, tanba sira nia publikasaun atraza kompara ho mídia sosiál sira.

“Mídia sosiál mosu ho informasaun ne’ebé mak lais, iha segundu nia laran sai ona, entaun dalaruma sei ema haree buat hanesan iha jornál ka rádiu ema baruk ona, oinsá mak mídia sira nia programa mai bele asuntu ne’ebé hanesan maibé ho informasaun kompletu liu”, katak.

Nune’e mós parte KI hato’o preokupasaun kona-ba oinsá atu hasae ábitu leitura iha públiku hodi bele subskreve ba jornál sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here