Viseprezidente CCI-TL, João Alves. Foto espesiál.

DILI, (TATOLI)-Kámara Komérsiu no Indústria Timor-Leste (CCI-TL sigla iha portugés) hasoru malu ho Primeiru-Ministru (PM), Taur Matan Ruak, hodi aprezenta kestaun ne’ebé relasiona ho CCI-TL rasik liuliu kona-ba asuntu ekonómiku nian.

Viseprezidente CCI-TL, João Alves, haktuir PM husu para CCI-TL bele agresivu liután no fó hanoin oinsá atubele dezenvolve país ida ne’e di’ak liután ho situasaun ne’ebé maka agora akontese.

“Enkontru ida ne’e, Primeiru-Ministru husu para bele iha tan diálogu di’ak liután ho Kámara Komérsiu no Indústria iha tempu badak depois Orsamentu Jerál Estadu 2018, Orsamentu Jerál Estadu 2019 prontu tiha ami sei iha tan enkontru tuir fali mai para haree situasaun kona-ba ekonomia Timor-Leste nia loloos ne’e oinsá?”, João afirma ohin, hafoin soru-mutu ho PM iha Palásiu Governu.

Hatutan iha reuniaun ne’e mós ko’alia sobre sistema pagamentu, supervizaun no oinsá maka bele kria komisaun ida para bele halo avaliasaun no aprovasaun ba projetu sira ne’ebé iha.

“La’ós de’it dehan katak ami ezije de’it mak pagamentu, maibé husu Governu para kria komisaun para bele valoriza serbisu saida maka husi parte setór privadu halo tiha ona. Kria komisaun supervizaun, komisaun avaliasaun ida, ministériu kompetente, ministériu tékniku hamutuk ho inspesaun jerál sira para depois haree oinsá maka valoriza projetu ne’ebé durante ne’e setór privadu halo tiha ona no bele halo prosesu pagamentu”.

Sobre projetu ne’ebé laiha kualidade, João afirma kestaun ne’e la’ós haree husi matan de’it, maibé tuir laboratóriu maka hatudu obra ne’e laiha kualidade no iha kualidade.

“Labele haree ho matan dehan projetu ne’e laiha kualidade, mas hanoin hamutuk mós ho ADN (Ajénsia Dezenvolvimentu Nasionál) ami husu mós iha komisaun para bele iha serbisu ida integradu di’ak liu, interministeriál, hamutuk mós ho setór privadu”.

Viseprezidente ne’e hatutan PM mós preokupa ho pagamentu sira ne’e no espera Prezidente Repúblika bele promulga depois iha períodu badak ne’e Governu haree oinsá atu rezolve tiha problema ne’ebé maka dezde 2016, 2017 to’o agora.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here