Sosiedade Sívil Husu Mídia Konsensializa Komunidade Liuhusi Informasaun

DILI, (TATOLI)-Sosiedade Sívil hanesan FOKUPERS (Forum Komunikasaun ba Feto Timor-Leste) no PRADET (Psychosocial Recovery and Development in East Timor) husu ba mídia; jornál, rádiu, televizaun no online, atu konsensializa  komunidade liuhusi informasaun sira ne’ebé mak mídia públika no transmite.

Diretora Ezekeutiva FOKUPERS, Marilia da Silva Alves hateten katak iha konteúdu mídia, sira haree, dala barak akontese kazu violénsia doméstika, violénsia bazea ba jéneru, liliu hasoru feto no labarik, violasaun seksuál ba menoridade no agresaun seluk tan, tanba ne’e husu ba SEKOMS (Sekretáriu Estadu Komunikasaun Sosiál) no mídia sira atu halo advokasia no prevensaun, liuhusi informasaun sira.

“Entaun, ami hanoin katak iha media, liliu televizaun sira bele fó mós espasu atu halo konsensializasaun ba iha komunidade atu bele prevene violénsia sira ne’ebé akontese,” hateten diretora FOKUPERS, Marijia da Silva hafoin sorumutu ho Sekretáriu Estadu, Merício Juvinal Akara, iha Palásiu Governu, ohin lorokraik ne’e.

Diretora Marilia da Silva Alves mós informa katak durante sorumutu ho SEKOMS hato’o mós sira-nia preokupasaun kona-ba área komunikasaun sosiál nian rasik. Nune’e, nia haktuir katak SEKOMS hato’o mós planu SEKOMS nian rasik oinsa atu dezenvolve media.

“Hanesan sosiedade sívil, ami nafatin prontu halo kooperasaun ho governu, liliu sekretáriu estadu ne’e rasik atu kanaliza mós ba governu informasaun sira ne’ebé mak ami presiza hato’o,” akresenta diretora ne’e.

Iha fatin hanesan, Diretór Ezekutivu, Manuel dos Santos, ba jornalista sira katak durante sorumutu ho SEKOMS, sira fó hanoin katak SEKOMS nia papel atu dezenvolve serbisu komunikasaun di’ak liutan iha futuru, espesifikamente ba iha PRADET, oinsa partisipasaun mídia atu hatutan informasaun ne’ebé di’ak liutan iha área servisu saúde mentál nomós asuntu violénsia bazea ba jéneru.

“Nune’e fó edukasaun ruma ne’ebé edukativu ba iha komunidade atu bele komprende hodi nune’e, edukasaun naun-formál ruma ne’ebé ita lori ba iha komunidade, komunidade bele intende no halo kolaborasaun di’ak  para serbisu ne’e, ita ko’alia kona-ba kualidade, nia bele hetan rezultadu ne’ebé di’ak,” konklui diretór ezekutivu, Manuel dos Santos.

Entretantu, papel klásiku mídia, tuir komprensaun etimolójiku mak atu informa, eduka no diverte eh entretaina.

Jornalista: Rafy Belo

Editór : Manuel Pinto