Sekretáriu Estadu Komunikasaun Sosiál, Merício Juvinal dos Reis Akara.

DILI, (TATOLI) – Relasiona ho problema finanseiru ne’ebé mídia privada sira hasoru, Governu liuhosi Sekrétariu Estadu Komunikasaun Sosiál iha Orsamentu Jerál Estadu 2018 prevee rihun 50 resin hodi fó apoiu.

Governu rekoñese problema ne’e, tanba impase polítika ne’ebé akontese hodi implika ba orsamentu iha mídia privada sira.

ʺNu’udar governu ami iha atensaun ba preokupasaun ne’e, tanba ne’e iha orsamentu 2018 ita tau orsamentu para apoiu nafatin iha públisidade, mantein langanan (kliente) ho mídia privadu sira no seluk tan hodi aguenta to’o dezembruʺ, hateten Sekretáriu Estadu, Merício Juvinal dos Reis Akara, ba jornalista sira iha Palásiu Governu, ohin.

OJE 2019, tuir polítika SEKOMS sei fó atensaun finanseira ba mídia privadu sira hodi dezenvolve di’ak liután.

ʺIta sei fó atensaun barak liu iha orsamentu jerál Estadu tinan oin, tanba ne’e ami diskute hodi prevee orsamentu bainhira akontese nesesidade emerjénsia hodi fó apoiuʺ, realsa.

Mídia privada sira sei hetan apoiu bainhira OJE 2018 hetan ona promulgasaun hosi Prezidente Repúblika.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here