Diretór Jerál Autoridade Aduaneira AA, José António Fátima Abílio. Imajen Egas Cristovao.

DILI, (TATOLI) – Diretór Jerál Autoridade Aduaneira AA, José António Fátima Abílio, klarifika auzénsia Alfándega nian iha enkontru dala-tolu ho Primeiru-Ministru katak hanesan aman ba nasaun ida ne’e tenke respeita ba desizaun no instrusaun ne’ebé fó, maibé AA lamarka iha reuniaun, tanba lasimu konvokatóriu, telefone no mensajen ruma husi Gabinete Primeiru-Ministru (GPM) ou husi ema ne’ebé koordena enkontru ne’e.

Diretór Jerál esklarese ida ne’e, tanba Primeiru-Ministru lamenta tebes ho auzénsia Alfándega nian ne’ebé laiha justifikasaun atu tuir enkontru ho Xefe Governu dala-tolu ne’ebé ke Xefe Ezekutivu rasik mak husu, tanba ne’e aproveita iha enkontru Jornada Orsamental 2019 horisehik bolu atensaun ba orgaun ka Ajénsia Públika Estadu nian nomós serbidor Estadu sira hotu atu koopera ho Estadu no Governu ba buat di’ak ne’ebé Governu hakarak implementa ho objetivu ida de’it ba Timor-Leste nia bem-estar.

“Horisehik ha’u mós partisipa iha jornada orsamentál ba loron daruak nian bainhira ha’u rona Primeiru-Ministru fó sai ida ne’e, hanesan aman ba nasaun ne’e tenke respeita desizaun, instrusaun, polítika saida, instituisaun Estadu hotu tenke halo tuir, maibé depois enkontru iha intervalu kedan ha’u mos bá hasoru kedan eselénsia para klarifika situasaun ne’e”.

“Ha’u hatete katak Primeiru-Ministru deskulpa, Alfándega lapartisipa la’ós dehan lakohi ou larespeita ita-boot nia desizaun ou lakumpri, laiha lealdade ba ita-boot nia desizaun, maibé hakarak klarifika katak ami lapartisipa, tanba lasimu konvokatóriu ruma, lasimu telefone ou sms ruma husi Gabinete Primeiru-Ministru nian ou husi ema ne’ebé koordena enkontru ne’e”, Abílio katak iha Alfándega, ohin.

Diretór Jerál ne’e dehan Alfándega simu de’it despaxu husi PM nian dahuluk liu hodi hatete atu hala’o operasaun iha aeroportu Suai antes 15 setembru ne’ebé maka despaxu ne’e simu husi Ministra Finansa en ezersísiu no Alfándega halo kedan rotasaun no nomeasaun ba funsionáriu na’in-haat atu destaka iha aeroportu ne’e.

“Ita destaka mas ita tenke haree kondisaun seluk hanesan fasilidade ba sira atu halo atendimentu, osan kona-ba dezlokasaun sira-nian, komunikasaun, modem para sira lori asesu ba sistema, tanba ne’e ami serbisu online, maibé preparativu sira ne’e ami halo hotu ona, bainhira mak tun bá ami prontu. Agora, ligasaun ho konvite ne’e infelizmente ami lasimu dala-tolu”.

Abílio dehan se konvite mai mak lapartisipa liuhusi mensajen telemovel, email no karta ruma bele haree iha meiu sira ne’e no buka tuir tanba Alfándega laiha intensaun.

“Iha intervalu (iha jornada orsamentál 2019 ne’ebé hala’o iha Ministériu Finansas, horisehik) ha’u hato’o ba Primeiru-Ministru ami lapartisipa la’ós tanba ami lakohi, laiha konfirmasaun, ne’ebé Primeiru-Ministru dehan depois mak ha’u buka hatene”.

Tanba ne’e atu hatete kestaun ne’e iha mekanizmu para halo investigasaun ruma no Alfándega prontu.

“Se karik ami mak sala desizaun saida fó mai ami simu, tanba hanesan funsionáriu públiku, servidór Estadu, povu, ami prontu. Hanesan servidór povu buka responde ba povu nia preokupsaun, servidór Estadu prontu para implementa, ezekuta instrusaun, polítika Governu ida ne’ebé ka’er ukun”.

Nia hatutan ko’alia kona-ba estrutura Estadu signifika funsionamentu tun mai kraik hanesan de’it tantu militár ka sivíl nian tenke repseita ierárkia ne’ebé iha.

“Se ita lakumpri signifika ita kontra ona regra administrativa entaun tuir lei Funsaun Públika nian fó dalan para foti desizaun, tan ne’e konsidera asaun indisiplinár, maibé ba ida ne’e tenke husi prosesu investigasaun para nia rezultadu ne’e será ke ami mak sala duni mak lakohi partisipa ou ema ida koordena maka ignora tiha Alfándega lakohi inklui iha lista bá enkontru ne’e ou keta iha ema ruma mak iha intensaun seluk atu politiza duni situasaun, ami lahatene, husi investigasaun mak sei deklara loos”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here