Estudante KS, Bourdalonia Rosa da Silva Benevides (karuk), Elisensia da Costa Aires da Silva (loos) no Relojiando Fátima Viana Xavier (klaran) ne’ebé UNICEF apoiu. Foto: UNICEF

DILI, (TATOLI) – Organizasaun Nasaun Unida ba Fundu Labarik (UNICEF-sigla inglés) apoiu estudante Universidade Nasionál Timor Lorosa’e (UNTL), Fakuldade Siénsia Sosiál (FSS), Departamentu Komunikasaun Sosiál estájiu iha Rádiu Komunidade sira, hala’o programa kona-ba labarik nian.

Estudante estajiáriu sira ne’e mak Bourdalonia Rosa da Silva Benevides, Elisensia da Costa Aires da Silva no Relojiando Fátima Viana Xavier. Sira hetan oportunidade, tanba prestasaun akadémika di’ak.

Diretora Departamentu KS (Komunikasaun Sosiál), Dominica Dwikory. Foto FB: Eujevio Pereira

“Ita-nia estudante neneik bele muda sira-nia pensamentu kona-ba labarik”, katak xefe departamentu KS, Dominica Dwikory Sitaresmi, ba jornalista sira iha Kampus FSS, Kaikoli, ohin.

Xefe departmentu ne’e konsidera labarik mak futuru nasaun nian maibé dalaruma la fó atensaun no tratamentu. “Ita tenke haree, tau matan didi’ak ba labarik sira, proteje labarik husi hahalok aat sira, liliu kona-ba sira-nia direitu. Ita tenke kuidadu didi’ak sira, liliu sira-nia mentalidade”, afirma.

Nie esplika importante ba jornalista sira halo programa iha televizaun labele halo trauma labarik sira, nune’e mós iha hakerek. “Ha’u fó korajen ba ha’u-nia estudante. Labarik ne’ebé trauma bainhira nia boot dezenvolve nia án susar”.

Estájiu sei hala’o durante loron 22. “Husi UNICEF, sira hetan kada loron dolár 40”, subliña.

Dosente KS ne’e akresenta ideia ne’e husi UNICEF no fó oportunidade ba estudante na’in tolu de’it. “Entaun husi ami, hili estudante ne’ebé iha akadémiku di’ak liu duke seluk”.

Estudante estajiáriu na’in tolu ne’e sei dezloka ba Rádiu Komunitária sira iha munisípiu Ermera, Maliana (Bobonaro) no Vikeke.

Dezlokasaun estudante estajiáriu sira ne’e lansa diretamente husi Sekretáriu Estadu Komunikasaun Sosiál (SEKOMS), Merício Juvinal dos Reis Akara, perante akadémiku sira iha UNTL.

Video relevante; https://web.facebook.com/julio.dacosta.522/videos/1267704523372270/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here