Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, (TATOLI)- Diretór Jerál Finansas Estadu Ministériu Finansa (MF), Januário da Gama, hatete prioridade nasionál ne’ebé diskute durante loron rua (17-18) liuhusi jornada orsamentál seidauk to’o desizaun finál tanba MF tenke halo análiza fali ba iha tetu dezagregasaun ba ministériu no institutisaun sira no sei aprezenta ba Konsellu Ministru (KM) kona-ba despeza sira ne’e hafoin KM hola referénsia hodi determina loloos prioridade nasionál ba Orsamentu Jerál Estadu (OJE) 2019.

“Prioridade nasionál iha diskusaun balun halo ona parese orsida bele konsentra ba iha edukasaun, saúde, agrikultura no programa sira seluk ne’ebé Oitavu Governu haktuir nia plataforma programa tinan lima nian sei konsentra mós iha orsamentu jerál 2019 nian, maibé ba programa prioridade ba 2019 nian ne’e sei informa kuandu Ministériu Finansas aprezenta ona ba Konsellu Ministru iha semana ida ne’e nia laran”, Januário afirma ohin, iha konferénsia imprensa hafoin sesaun jornada orsamentál remata iha Aitarak-Laran.

Sekretáriu Estadu Komunikasaun Sosiál (SEKOMS), Merício Juvenal dos Reis “Akara”, hatutan iha jornada orsamentál ne’e iha pontu importante balun ne’ebé iha katak aprezentasaun ne’ebé halo husi aprezentadór kapa’as nune’e Primeiru-Ministru apresia tebes liuliu liga ba sistema planeamentu no jestaun finansas públikas nian.

“Ita-nia aprezentadór sira aprezenta ho sistemátika, liuliu liga ba orsamentu Estadu esplika kapa’as loos sobre prioridade nasionál ba 2019, orienta ita atu diskute kona-ba oinsá ita deside tetu fiskál 2019, entaun Primeiru-Ministru kontente ba loron rua ne’e, hanesan mós membru Governu foun ita aprende barak ho ita-nia diretór, ekipa téknika, asesór sira”, Merício katak mós iha konfrénsia imprensa ne’e.

Aprezentadór sira mai husi Unidade Planeamentu no Monitorizasaun no Avaliasaun (UPMA), Reforma Fiskál, Banku Sentrál, MF, Ajénsia Dezenvolvimentu Nasionál (ADN) fó sira-nia perspetiva ne’ebé ajuda Governu atu konsentra no uza hanesan referénsia para diskute fali iha konsellu-ministru.

“Ideia sira ne’e, dadus, dokumentu hotu durante loron rua parezenta ita sei konsidera, sei lori ba konsellu ministru atu halo kle’an liu, ikus ita sei deside polítikamente prioridade hirak ne’e antes ita lori ba Parlamentu Nasionál”.

Hatutan Primeiru-Ministru fó ona mensajen, iha espíritu para haree didi’ak, iha dixiplina, uza prinsípiu poupansa, rasionaliza despeza no kada membru Governu liuliu PM sei diskute kle’an no fó atensaun maka’as antes deside.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here