Reprezentante sira hosi Forum Komunikasaun Valores Nasaun (F-KOVANA) hasai foto hamutuk ho Prezidente Repúblika, Francisco Guterres Lú Olo, hafoin reuniaun ramata. Imajen Mídia PR

DILI (TATOLI)—Forum Komunikasaun Valores Nasaun (F-KOVANA) hala’o enkontru ho Prezidente-Repúblika, Francisco Guterres Lú Olo, hodi informa organizasaun F-KOVANA nia misaun no apoiu morál ka ideia hosi Prezidente-Repúblika ba ninia instalasaun.

Organizasaun ne’e mós husu disponibilidade hosi Prezidente-Repúblika atu sai nia patronu ba organizasaun refere.

“Razaun harii organizasaun ne’e tanba valór nasaun ohin loron iha problema boot nia laran tanba ne’e presiza prezerva no konserva valór istóriku, kulturais no atuais ne’ebé mak hetan implikasaun maka’as ho moris ohin loron ninian,” Eládio ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin soru-mutu ho Xefe Estadu Lú Olo.

Entretantu, Prezidente-Repúblika apresia órgaun sira ne’ebé eziste hodi kontribui átu (acto) pozitivu ba konstrusaun Estadu ne’e nian no hato’o katak nia disponível atu sai patronu ba Forum ne’e.

Xefe Estadu mós husu atu halo kooperasaun ho relijiaun hotu-hotu iha Timor iha prosesu estabelesimentu organizasaun, promove aspetu morál hosi família, sosiedade no nasaun, promove rekonsiliasaun ba solusaun konflitu no edukasaun sívika nasionál ne’ebé forte.

Reprezentante F-KOVANA, Eládio Faculto komprometidu katak organizasaun refere sei fó apoiu tomak ba Prezidente-Repúblika atu hala’o nia mandatu konstitusionál.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here