Ministru Dionísio Babo Soares hasoru malu ho nia omólogu Vietnam, Pham Binh Minh. Foto: MNEK

DILI, (TATOLI) – Ministru Negósiu Estranjeiru no Kooperasaun (MNEK), Dionísio Babo Soares, hatete Vietname hakarak halo akordu ho Timor-Leste iha área agrikultura, peska no kursu lian-vietname ba tropa sira.

Komunikadu MNEK, husi Hanoi, kapitál Vietname ne’ebé Tatoli simu ohin haktuir hanoin servisu hamutuk ne’e mosu bainhira ministru Dionísio Babo enkontru ho nia omólogu, Pham Binh Minh, iha Vietname.

Sorumutu ne’e hametin liutan servisu hamutuk ne’ebé durante ne’e la’o ona.

Durante estadia iha Vietname, ministru akompaña husi embaixadora Timor-Leste ba Vietname, Pascoela Barreto ho delegasaun halo vizita kortezia no enkontru bilaterál ho nia omólogu, Repúblika Sosialista Vietname, Pham Binh Minh, iha salaun enkontru MNEK, Hanoi-Vietname.

Sorumutu dahuluk entre xefe diplomata rua ne’e, hato’o kumprimentu no kongratula Vietname ne’ebé sai uma na’in ba Forum Ekonómiku Mundiál (FEM) no partisipasaun iha Asian Games 2018, inklui hato’o mós konvite ba Ministru Negósiu Estranjeiru Vietname atu halo vizita ofisiál mai Timor-Leste.

Iha parte seluk, ministru Pham Binh Minh, hato’o bemvindu no kongratula Dionísio Babo Soares, nu’udar MNEK eleitu ba VIII governu konstitusionál inklui mós partisipasaun TL nian iha FEM no konvida governu TL hodi bele vizita ofisiál iha Vietname.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here