Estudante Kuatru Setembru, Díli, hiit aifunan molok kari ba tasi laran. Foto FB: Hernani Morato

DILI, (TATOLI) – Governu no povu Timor-Leste fó omenajen ikus ba saudozu Kofi Atta Annan ho misa ba matebian no kari aifunan iha tasi laran, iha Prasa Proklamasaun, Palásiu Governu nia oin, lorokraik ne’e.

Misa ne’e diriji husi padre paroku katedrál, José António. “Ho sentidu pezar (laran kraik), ita hasoru malu ohin hodi asinala (marka) no reza hamutuk ba belun boot Timor-Leste eis-sekretáriu jerál organizasaun Nasaun Unida”, hateten Prezidente Parlamentu Nasionál (PN), Arão Noe, iha nia omenajen ba saudozu iha Katedrál Nossa Senhora Imaculada da Conceição, Vila verde.

Prezidente PN, Arão Noe, husu ema hotu atu hato’o orasaun, reza ba saudozu Kofi Annan tan buat di’ak hotu ne’ebé nia halo ona, medida sertu ne’ebé nia konsege hodi komunidade boot nasaun unida nian hela ho di’ak.

“Ita sai kiak liutan ho nia partida, maibé ita sai riku liutan, tanba ninia kontributu ba umanidade”, katak Arão Noe perante korpu diplomátíku, entidade relijioza sira, reprezentante orgaun soberanu, sosiedade sívil, komunidade no estudante.

Prezidente orgaun lejislativa ne’e haktuir hafoin hatene saudozu eis-sekretáriu jerál nasaun unida, Kofi Anna, nia mate, PN hato’o konsternasaun liuhusi aprovasaun votu laran kraik ida no debate kona-ba papel determinante Kofi Annan iha Timor-Leste nia independénsia, kondús intervensaun emosionada husi bankada parlamentár hotu.

“Halo mós proposta ida, ne’ebé hakarak haree konfirmada, atribuisaun naran Kofi Annan nian ba dalan ida iha Dili”, garante.

Entretantu, iha biban hanesan reprezentante sosiedade sívil-Rede Feto no reprezentante korpu diplomátiku sira rezidente iha Timor-Leste, embaixadora Nova Zelándia, Viki Poole no reprezentante Nasaun Unida, Roy Trivedi, manifesta mós sira-nia sentidu kondolénsia ba família enluta, saudozu Kofi Atta Annan no komunidade internasionál.

Misa ne’e ho tempu hanesan funerál ba saudozu Kofi Atta Annan nian iha Ghana-Áfrika. Adeus Kofi Anna, Hakmatek ba nia klamar iha reinu lalehan!

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here