Prezidente PD, Mariano Assanami Sabino. Imajen/ TATOLI

DILI, (TATOLI) – Prezidente Partidu Demokrátiku (PD), Mariano Assanami Sabino, sorumutu ho Primeiru-Ministru (PM), Taur Matan Ruak, hodi fó hanoin ba governu atu halo diálogu.

“Ami ko’alia de’it kona-ba oinsá atu diálogu ba malu, PD nia votu a favór ba Orsamentu Jerál Estadu (OJE) 2018 foin dadauk ho razaun, orsamentu ne’e kontinuasaun, orsamentu ne’ebé mak PD ho FRETILIN mós hola parte iha governu anteriór no ohin governu atuál fó kontinuidade iha tinan 2018”, tenik iha sala bankada PD, ohin, hafoin hasoru malu ho Xefe Governu.

Tuir nia prinsípiu kuandu manan eleisaun Prezidente, sei kompete mesak no povu fó konfiansa ba individu para sai Prezidente Repúblika (PR), maibé governu ba partidu ne’ebé mak manan no halo koligasaun tuir konstituisaun haruka mas sira ne’ebé mak lakon no povu bain-bain.

“Sira manan ba kondutór maibé ita nafatin iha kareta ida, la’os iha kareta diferente, tanba ne’e mak rekoñese malu, diálogu no ko’alia ba malu ne’e sempre importante”.

“Koalia ba malu la’os ita atu halo lobi ba malu, ita mai la’os ho pre-kondisaun katak ha’u mai ona tenke aseita ha’u nia hanoin no halo tuir, maibé ko’alia ba malu hanesan konsidera malu”, akresenta.

Deputadu Bankada PD ne’e mós dehan demokrasia la’os para ho maioria no minoria de’it maibé hafoin eleisaun ne’e remata, lider sira iha responsabilidade atu jere no halo jestaun ba demokrasia, atu rekoñese malu katak balun manan, balun la manan no balun nein iha asentu iha Parlamentu Nasionál (PN) maibé sira hotu kompete.

Nia afirma tan lema PD ne’ebé dehan Maubere oan prontu atu serví, labele intrepreta dehan tenke iha governu no iha  hanoin tama governu maibé tenke haree katak bainhira iha governu tenke serví no ezekuta ho di’ak.

Nune’e mós bainhira iha PN, katak tan tenke hala’o ninia funsaun nu’udar deputadu, kontrola no ezerse funsaun hodi fiskaliza lalaok governu nian.

“Bainhira interese ba povu sei a favór, maibé bainhira iha sasan sira ne’ebé mak la’o sala ami sei dehan la’e (kontra)”, katak.

Biban ne’e hanesan eis governante ida, nia mós fó hanoin balun kona-ba oinsá haree setór agríkola hanesan setór ida ne’ebé mak importante.

“Ita haree katak ba futuru ne’e presiza fó prioridade mós ba barrajen, tanba elementu tolu importante iha setór agríkola mak bee, loron matan no rai, ita sei falta iha jestaun bee. Governu ida ne’e seidauk bele fó prioridade atu halo barrajen no iha passadu fó prioridade ona ba irigasaun, mas barrajem ita seidauk halo”, katak tan.

Tuir nia setór privadu sira labele depende de’it ba governu maibé presiza mós tau matan atu investe iha setór barrajen, tanba bee importante ba ai-horis, animal, ambiente no ema.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here