Joven sira partisipa treinamentu iha KJFL. Foto/KJFL.

DILI, (TATOLI) – Knua Juventude Fila-Liman (KJFL) dezde harii iha 2017 fó ona formasaun oioin ba joven 300 resin no iha ona benefisiáriu kuaze 5000 ne’ebé uza ona sentru ne’e.

Asistente Jerente Projetu Knua Juventude Fila-Liman (KJFL), João Maria Tapel, informa benefisiáriu sira ne’e liuliu estudante universitáriu sira husi Universidade Nasionál  Timor Lorosa’e (UNTL), universidade privada no joven sira.

“Sira mai iha ne’e tanba iha workshop barak husi ami-nia parseiru, kadavés semana ida iha rua, tolu husi ajénsia Nasaun Unida nian, parseiru sira seluk ne’ebé mak fó informasaun”, dehan nia iha Patéo, ohin.

Nia dehan: “Ami mós iha parseiru sira maka BNCTL, IADE, SEFOPE, Telemor ne’ebé mak hanesan setór privadu ida fornese internét garatuita iha ne’e, nune’e fó benefísiu ba joven sira liuliu estudante oinsá uza hodi halo sira-nia traballu, peskiza ideia negósiu”.

Nia haktuir iha Timor-Leste kada tinan ema barak mak gradua, maibé menus liu mak hetan serbisu entaun KJFL iha intensaun atu suporta joven sira hodi kria rasik sira-nia empregu.

Tanba ne’e KJFL loke oportunidade ba joven sira no lataka dalan ba ema ida no joven ida ne’ebé mak iha ideia negósiu di’ak no iha kompromisu maka knua sei apoia atu sai empreendedór ida.

“Joven ne’ebé iha kompromisu husi knua bele suporta atu realiza ideia atu sai emprezáriu ou karik bele buka serbisu knua bele liga atu nia bele emprega iha fatin ruma ou iha treinamente espesífiku ne’ebé mak rekere”, asistente seniór ne’e katak.

Tanba ne’e KJFL enkoraja nafatin foinsa’e sira atu bele mai tuir treinamentu ne’ebé realiza iha fatin ne’e.

“Kadavés ami iha treinamentu ami tenke bá bolu iha UNTL atu dada joven sira ne’e mai ou workshop ruma iha ne’e ami lori karta konvite. Ha’u haree iha Timór, joven ita-nia iha kompromisu ladún barak iha maneja tempu atubele tuir oportunidade sira hanesan ne’e”.

Tanba ne’e nia dehan presiza aproveita tempu sira ne’e hodi dezenvolve aan, nune’e futuru sai empregadu ou empregadór ne’ebé di’ak ba nasaun liuliu kontribui ba dezenvolvimentu.

KJFL mak sentru integradu ida ba inovasaun no empreendedorizmu, suporta husi Programa Nasaun Unida ba Dezenvolvimentu (PNUD) Timor-Leste ne’ebé mak iha sentru ne’e joven sira bele asesu informasaun no hetan kapasitasaun liuhusi atividade fortalesimentu oioin hodi hasa’e abilidade serbisu no empreendedorizmu no promove sira-nia lian iha dezenvolvimentu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here