DILI, (TATOLI) – Asistente Jerente Projetu Knua Juventude Fila-Liman (KJFL), João Maria Tapel, hatete iha Timor-Leste kada tinan ema barak mak gradua, maibé menus liu mak hetan serbisu entaun KJFL iha intensaun suporta joven sira hodi kria rasik sira-nia empregu.

Tanba ne’e KJFL fornese oportunidade ba joven timoroan hodi aprende iha fatin ne’e, tanba knua nu’udar sentru integradu ida ne’ebé loke ba foinsa’e hotu ne’ebé foka liu ba pilár rua mak empreendedorizmu no treinamentu iha área oioin.

“Atu joven ida kria rasik nia serbisu no nia mós bele emprega ema, karik nia negósiu ne’e la’o bá oin. Ita haree iha joven 20 hanesan ne’e mak sai emprezáriu hafoin tuir treinamentu no balun iha negósiu ki’ik, maibé komesa espande no emprega ona ema ida, rua ka tolu”, João dehan iha Páteo, ohin.

Aleinde ne’e KJFL mós dezenvolve planu negósiu barak no tenknikamente suporta ideia planu negósiu husi joven sira liuhusi fundu ne’ebé mak iha instituisaun finanseira sira.

“Hanesan BNCTL, kréditu uniaun, maibé sira rasik tenke iha garantia ne’ebé mak tuir rekizitu husi instituisaun sira ne’e, kuandu sira-nia planu negósiu di’ak no sustentavel atu fó filafali osan hirak ne’e”.

Kona-ba ema 20 resin ne’ebé sai empreendedór ne’ebé mak rezulta husi knua ne’e daudaun halo hela sira-nia negósiu iha Dili laran hodi halo atividade fornese hudi-sona iha supermerkadu iha Dili, balun fornese foos-rai, seluk haki’ak manu, loke kantina no iha área agrikultura mak fornese morangu (strawberry) husi Maubise, seluk fali iha dezeña kartaun no produsaun ba bee galoon lafahek ne’ebé mak hetan fundu husi Governu Austrália hodi halo produsaun bee-moos ne’e.

“Ami halo vizita semanál ba joven sira, haree sira-nia progresu hodi fó ideia karik iha buat ruma atu aumenta, ami mós liga sira ho konsumidór sira liuliu iha website filaliman.tl atu públika produtu sira ne’e”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here