DILI (TATOLI) – Prezidente Tribunál Rekursu (PTR), Deolindo Dos Santos informa konaba auditoria ne’ebé Kámara Kontas halo ba Zona Ekonomia Espesiál Sosiál Merkadu (ZEESM), nia relatóriu sei publika iha pájina ofisiál (website rasik), hafoin parte ne’ebé hetan audit notifikadu.

“Konaba ZEESM ne’e, iha lei Kámara Kontas nian hateten, hafoin parte sira notifikadu, liu-liu identidade sira ne’ebé mak hetan audit ne’e notifikadu hotu mak Tribunál sei publika iha nia website rasik. Iha publikasaun ne’e ita bot sira bele hetan asesu ba dokumentu ne’e rasik”, tenik ba jornalista sira iha Palásiu Governu, tersa ne’e.

Hodi hatutan, auditoria ba ZEESM, Tribunál kumpri ona nia servisu relatóriu no notifika ona ba identidade auditaria, autoridade rasik no entidade sira ne’ebé mak Lei Kámara Kontas nia haruka para fó hanoin mós.

“Ida ne’e parte tomak husi prosesu ne’ebé mak Tribunal no Kámara kontas nia planu rasik. Buat balun la’o ona, ikus liu mak ZEESM, no seluk tan ne’ebé hala’o nafatin”, dehan tan.

Tuir nia, Tribunál bele kontribui buat ne’ebé mak konstituisaun no lei hatete no kestaun hanesan mós sei hare ba prosesu ne’ebé mak agora sei pendente iha Tribunál Rekursu iha parte auditoria nia.

Maski nune’e, iha biban ne’e Juis Deolindo dos Santos la esplika klaru kona bainhira los mak notifika parte sira ne’ebé hetan audit ona.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here