Xefe Kaza Sivíl Prezidénsia Repúblika, Francisco Maria de Vasconcelos

DILI, (TATOLI) – Prezidénsia Repúblika, segunda horisehik simu ona lei Orsamentu Jerál Estadu (OJE) 2018 ne’ebé aprova ona hosi membru Parlamentu Nasionál iha sesta (7/9) ho montante billiaun $1.2.

Xefe Kaza Sivíl Prezidénsia Repúblika, Francisco Maria de Vasconcelos, ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, katak Prezidente Repúblika, Francisco Guterres Lú Olo, estuda hela no tuir lei durante loron 30 nia laran atu promulga ka la’e.

“Prezidente Repúblika estuda lei orsamentu ne’e to’o loron 30 no bele mós la to’o loron 30. Depende ba Xefe Estadu. Bainhira estuda hotu ona, nia sei fó sai ba públiku promulga ka la’e, ne’e Prezidente nia kompeténsia”, katak.

OJE 2018 ne’ebé hetan aprovasaun hosi deputadu sira iha semana kotuk ho votu afavór 42, kontra sia no abstensaun 14, nu’udar karáter urjénsia atu atende ba mákina Estadu nomós selu dívida-sira ne’ebé Governu anteriór la konsege rezolve.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here