Foto/Google.

DILI, (TATOLI) – Diresaun Nasionál Regulasaun Komersiál Ministériu Turizmu, Komérsiu no Indústria (MTKI), sei serbisu hamutuk ho operadór telekomunikasaun iha Timor-Leste atu halo sistema kontrolu ba negósiu online.

“Operadór telekomunikasaun tolu iha Timor-Leste ami sei halo kooperasaun ho sira asina MoU (memorandum of understanding) ida para halo sistema kontrolu atu atua situasaun ida ne’e”, Diretór Nasionál Regulasaun Komersiál Ministériu Turizmu, Komérsiu no Indústria (MTKI), Domingos da Costa Soares, informa iha Bebora, ohin.

Nune’e diresaun tau ona iha planu atu halo ida ne’e, tanba presiza rekursu no orsamentu, entaun ne’e sei realiza iha 2019.

“Ami sei koopera ho operadór sira ne’e para ami bele hatene ida ne’e husi ema ne’ebé? Ita fasil atu deteta ema ne’ebé fa’an, nia fatin ne’e tuir market inteligence ne’e balun ami indentifika ona?”, katak.

Tanba ne’e atu proteje direitu konsumidór ba produtu ne’ebé fasil atu hetan, maibé dalaruma sasán ne’ebé simu lahanesan maka diresaun sei foku ba negósiu ida ne’e.

“Tuir ami-nia dadus ne’ebé iha risku liu mak ai-moruk ho kosmétika, maibé daudaun negósiu online ne’ebé iha ita bele dehan aas mak ai-moruk ho kosmétika. Ami konsege ona deteta no ami-nia ema mós sai hanesan sira-nia kliente no hatene ona”.

Tanba negósiu ne’e utiliza teknolojia maka atu halo asaun presiza mós hatene ida ne’e maka importante prepara rekursu ho di’ak.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here