Estudante timoroan iha Vietnam. Foto: MNEK

DILI, (TATOLI) – Estudante timoroan na’in 26 kompostu husi feto 14 no mane 12, estuda gratuita iha Universidade Thái Nguyên, Provínsia Thái Nguyên-Vietnam, tanba universidade ne’e rasik mak finansia.

Estudante hirak ne’e selu de’it eletrisidade no bee inklui dormitóriu ne’ebé mak sira hela ba ho fundu rasik.

Sira estuda iha área espesialidade Finansa hanesan akuntabilidade, susteentabilidade ambiente, negósiu internasionál no administrasaun negósiu.

Bainhira Ministru Negósiu Estranjeiru no Kooperasaun (MNEK), Dionísio Babo Soares, to’o iha Vietnam, alende vizita ba embaixada Timor-Leste iha Hanoi, kapitál Vietnam, hasoru malu mós ho estudante timoroan sira ne’e.

“Xefe Diplomata timoroan mós hala’o enkontru ho estudante timoroan hamutuk na’in 26 ne’ebé mak agora hala’o hela sira-nia estudu”, haktuir komunikadu MNEK husi Hanoi ba Ajénsia TATOLI, ohin.

Vizita diplomata timoroan iha Hanoi, kapitál vietnamita, akompaña husi embaixadór dezignadu Timor-Leste ba Vietnam, Pascoela Barreto dos Santos.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here