Veteranu Austrália hala’o vizita kortezia ba Prezidente Repúblika, Francisco Guterres Lú Olo, ho objetivu atu hametin relasaun entre nasaun Austrália no TL nomós veteranu australianu ho veteranu timoroan. Imajen Mídia PR

DILI, (TATOLI) – Veteranu Segunda Guerra Mundiál, Alexander Ian Hampe, rekoñese Austrália oras ne’e debe hela Timor, tanba timoroan sira arriska sira nia vida hodi proteje forsa Austrália iha tempu Segunda Guerra Mundiál.

“Ha’u sente fuan moras karik Austrália la halo buat di’ak ruma ba Timor, tanba ami sente katak ba Timor ne’e Austrália debe Timor nia dívida boot teb-tebes. Ha’u fiar katak ami sei la moris to’o ohin loron no fila ba haree ami nia família karik la hetan apoiu hosi povu Timor-Leste iha tempu Segunda Guerra Mundiál”, Alexandre ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin hamutuk ho veteranu Austrália sira seluk vizita Prezidente Repúblika, Francisco Guterres Lú Olo, nu’udar jestu ida atu hametin relasaun entre veteranu Austrália no Timor-Leste.

Veteranu Segunda Guerra Mundiál, Alexander Ian Hampel ho Prezidente Repúblika, Francisco Guterres Lú Olo, komprimenta malu. Imajen Mídia PR

“Se buat balun ne’ebé maka agora Austrália fó tulun ona ba Timor karik no buat ne’ebé maka Austrália sei fó tulun ba Timor iha futuru, ne’e hanesan mós debe ida ne’ebé Austrália halo hela ho rai ida ne’e”, nia hatutan.

Alexandre afirma esperiénsia ne’ebé nia hetan fila fali bainhira hakat hikas mai TL hafoin Segunda Guerra Mundiál, ne’e hanesan onra ka previléjiu ida.

“Ho espíritu ne’ebé maka konstrui tiha ona iha Segunda Guerra Mundiál, ha’u sente katak espíritu ida ne’e haforsa amizade povu nasaun rua ne’e para la’o ba oin”, akresenta.

Alexander Ian Hampel partisipa iha operasaun militár no ró ne’ebé uza hetan tiru hosi forsa japoneza no mout iha Betano, iha Setembru 1942.

Entretantu, Xefe Estadu, Francisico Guterres Lú Olo, louva kooperasaun veteranu hosi Austrália no Timor-Leste nu’udar dalan atu hametin relasaun entre nasaun rua.

Iha nia mensajen ba veteranu sira hosi Austrália, Lú Olo hateten programa Timor Awakening/ Hafanun-an iha Timor hahú rejistra ona rezultadu di’ak la’ós ba de’it Veteranu Austrália maibé mós ba Veteranu Timor-Leste no sujere rograma ne’e presiza apoiu hosi ema hotu, liuliu hosi Governu Timor-Leste, tanba sei promove fatin istóriku sira nune’e sobrevivente sira maka sei tatoli rasik sira nia istória no bele hetan istória libertasaun loloos.

Prezidente Repúblika haksolok tebes hodi simu Veteranu Segunda Guerra Mundiál, Alexander Ian Hampel nu’udar sobrevivente ne’ebé sei moris hodi vizita Timor-Leste.

“Ha’u sempre simu Veteranu Austrália ho laran-ksolok tebtebes. Ita-Boot sira-nia prezensa fó hanoin fila fali mai ha’u, ha’u–nia aman no maluk sira seluk ne’ebé fó kedas apoiu ba forsa Australiana, durante Segunda Guerra Mundial, iha ami-nia rain, atu harii fila fali pás iha mundu”, Lú Olo haktuir.

Prezidente Repúblika hatutan hosi apoiu inkondisionál ne’ebé timoroan sira fó kedas iha Segunda Guerra Mundiál, hatudu solidariedade entre ita ema la hatene fronteira no amizade entre povu sira haforsa iha tempu difísil.

“Biar relasaun direta entre forsa Australiana no timoroan sira ladún kle’ur, maibé amizade ne’ebé kuda durante Segunda Guerra Mundiál, hametin tiha ona iha tempu ne’ebá”, nia dehan.

“Iha luta libertasaun nasionál, Timor-Leste simu apoiu konsistente no persistente hosi eis-Kombatente barak Segunda Guerrra Mundiál nian nomós hosi sira-nia família. Ho lala’ok ki’ik maibé halo beibeik iha tinan barak nia laran hamutuk ho komunidade timorense no ho amigus ne’ebé hetan ba beibeik, konsege mobiliza opiniaun públika Australiana hodi apoia povu Timor-Leste ninia hakarak”.

Hatutan tan: “Ema rihun ba rihun ne’ebé halo manifestasaun iha lurón, iha Setembru 1999, no INTERFET tama iha Timor-Leste, mai hosi solidariedade furak no amizade ne’ebé ita harii no hametin”.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here