Prezidente Tribunál Rekursu, Deolindo dos Santos

DILI, (TATOLI) – Prezidente Kámara Kontas atuál Prezidente Tribunál Rekursu, Deolindo dos Santos, hateten Kámara Kontas sei públika relatóriu auditoria ne’ebé Kámara Kontas halo ba ministériu sira inklui Zona Espesiál Ekonomia Merkadu Sosiál (ZEESM).

“Públiku hakarak asesu konteúdu hosi relatóriu ne’e rasik, iha tempu badak nia laran ami sei publika iha website tribunál nian tuir lei Kámara Kontas nian haruka”, Deolindo ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba serbisu tribunál nian.

Nia klarifika relatóriu ne’ebé ema balun lansa iha rede sosiál hodi indika irregularidade iha ZEESM ne’e la’ós mai hosi tribunál.

“Ha’u asegura pursentu 100 (100%) ida ne’e la sai hosi tribunál. Nein ha’u no ha’u nia pesoál iha tribunál maka hasai dokumentu ne’e ba públiku, tanba dokumentu ne’e só ha’u de’it maka iha. Enkuantu dokumentu ne’e sei iha ha’u, ne’e seidauk hasai ba públiku.  Tanba kuandu dokumentu sai hosi tribunál ba públiku tenke tuir buat ne’ebé lei estabelese”, Deolindo esplika.

Konteúdu hosi relatóriu ne’e, Prezidente Tribunál Rekursu afirma nu’udar juiz ida nia sei la fó sai ba públiku.

“Ha’u nu’udar juiz ne’ebé maka aprova relatóriu ne’e rasik, ha’u labele emiti fali ha’u nia opiniaun kona-ba konteúdu relatóriu ne’e, tanba bele kontradis ho konteúdu relatóriu, tanba lei la permiti atu ha’u halo komentáriu ba ha’u nia desizaun rasik”, Deolindo afirma.

Ne’e duni, nia dehan, bainhira ko’alia kona-ba konteúdu relatóriu ne’e, presiza lee relatóriu ne’ebé nia pájina hamutuk liu atus lima (500) no husu atu lee didi’ak relatóriu ne’e molok hasai opiniaun, tanba bainhira atu to’o konkluzaun liuhusi prosesu naruk ida.

Deolindo haklaken, aleinde ZEESM, Kámara Kontas mós halo ona auditoria ba ministériu sira hanesan Ministérisu Edukasaun (liu-liu merenda eskolár), Ministériu Obras Públikas, Ministériu Negósiu Estranjeiru nomós kontinua halo ba ministériu sira seluk ne’ebé seidauk.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here