Foto espesiá.

DILI, (TATOLI) – Diretór Jerál Sekretáriu Estadu Formasaun Profisionál no Empregu (SEFOPE), Paulo Alves, hatete kompromisu nasionál ne’ebé iha liuhusi Governu daualu Konstitusionál katak sei kria postu traballu rihun 60 ba timoroan sira, tanba ne’e sei tau konsentrasaun iha área formasaun husi 2018 to’o 2022.

“Sentru formasaun Timór nian ne’e boot liu iha SEFOPE nia okos mak Tibar, konsentra iha Dili de’it, tanba ne’e iha hanoin balun husi Sekretáriu Estadu katak durante tinan lima mandatu ita sei loke sentru formasaun másimu rua iha rejionál sira, ezemplu iha Baukau ne’ebá para korresponde ho Baukau, Lautein, Vikeke inklui Manatutu no iha mós planu ida antes mandatu remata ita bele harii sentru formasaun ida iha Same para bele korresponde sira iha Ainaru, Same ho Kovalima”, Paulo informa iha Kaikoli, ohin.

Nune’e bele fó oportunidade ba joven timoroan sira ne’ebé maka hela munisípiu liuliu iha área rurál ne’ebé labele hetan asesu mai sentru formasaun Dili, entaun bele loke iha ne’ebá.

“Aleinde ne’e mós kapasidade sentru formasaun ne’ebé ita iha en termu aula ne’ebé tinan-tinan labele fornese barak ba sira, tanba limitasaun aula, ne’e mak iha polítika ida atu espande tan sentru formasaun para ita fornese la’ós de’it ba sira ne’ebé aprende kanalizasaun, karpinteiru ho pedreiru, maibé pelu menus ita bele koloka formasaun iha área ba sira ne’ebé hakarak serbisu iha Korea Súl, sira bele tuir formasaun ba sentru ne’ebé ita loke ona”.

Diretór Jerál ne’e afirma iha 2018 seidauk bele loke sentru formasaun, tanba orsamentu ne’ebé tau iha tinan ne’e ba SEFOPE iha millaun U$2.2 ba kategoria tolu de’it no millaun U$1.2 ne’e selu ba funsionáriu permanente no rihun U$600 ba bens no servisu, rihun U$300 selu ba funsionáriu kazuál ne’ebé iha Dili no munisípiu no kapitál dezenvolvimentu ne’ebé iha orsamentu uitoan de’it.

“Ne’ebé iha 2018 nia, setembru to’o dezembru ami seidauk aloka orsamentu atu konstrui sentru formasaun sira ne’ebé maka iha. Planu ida ne’e husi 2019 to’o 2022, espera katak planu ida ne’e ami sei realiza tuir tarjetu ne’ebé ami hakerek ona, bele atinje to’o 2022”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here