Ministru Negósius Estranjeirus no Kooperasaun Dionísio da Costa Babo Soares. Imajen Egas Cristovão

DILI, (TATOLI)-Ministru Negósiu Estranjeiru no Kooperasaun (MNEK), Dionísio Babo Soares, sei reprezenta governu Timor-Leste (TL), nu’udar enviadu espesiál partisipa Forum Ekonómiku Mundiál (FEM) ba da-27 iha Hanoi, kapitál Vietnam, ASEAN (Organizasaun Sudeste Aziátiku-sigla inglés).

Forum ho tema “ASEAN 4.0: Entrepeneurship and the Fourth Industrial Revolution ne’e, sei hahú iha 11 to’o 13 setembru 2018.

“Benefísiu husi Timor-Leste nia partisipasaun ba eventu refere mak atu aumenta liutan ita-nia vizibilidade iha nível internasionál, hasa’e ita-nia abilidade no koñesimentu iha área ekonómiku ne’ebé sai nu’udar rekezitu prinsipál ba Timor-Leste nia mehi ba adezaun ho organizasaun ASEAN,” refere komunikadu MNEK, Ajénsia TATOLI asesu iha MNEK, Praia dos Coqueiros-Díli, ohin.

Partisipasaun anteriór Timor-Leste nian iha forum refere hanesan “Reuniaun Anuál Forum Ekonómiku Mundiál ba dala-46”, hala’o iha loron 20 to’o 23 janeiru 2016 iha Davos-Klosters, Suisa (Switzerland) no “FEM ba dala-25”, hala’o iha loron 1 to’o 2 juñu 2016 iha Kuala Lumpur, Malázia ne’ebé reprezenta hosi Eis-primeiru-ministru, doutór Rui Maria de Araújo, akompañadu hosi eis Vise-ministru MNEK, Roberto Soares.

Inklui, “FEM ba dala-26”, hala’o iha loron 10 to’o 12 maiu 2017 iha Phnom Penh, Kamboja, reprezenta hosi Eis-ministru MNEK, Hernani Coelho ho Eis-ministru Agrikultura no Peskas, Estanislau da Silva.

Durante eventu tolu ne’e, reprezentante timoroan sira uza oportunidade ne’e hodi fahe esperiénsia no vizaun Timor-Leste nian kona-ba dezenvolvimentu ekonómiku nomós hetan esperiénsia no informasaun kona-ba ekonomia internasionál hosi lider país sira seluk no autór sira iha setór ekonómiku mundiál.

Entretantu, FEM ne’e Organizasaun Internasionál ba kooperasaun públiku no privadu ne’ebé estabelese iha tinan 1971, nu’udar fundasaun naun-lukru iha Geneva, Suisa (Switzerland) ho komprímisiu atu hasa’e/habo’ot ekonomia iha mundu liuhosi kooperasaun entre emprezáriu sira, polítiku sira, akadémiku sira no lider sira seluk hodi forma ajénda globál, rejionál no indústria.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here