Segundu Komandante Jerál Polísia Nasionál Timor-Leste (PNTL), Faustino da Costa

DILI, (TATOLI) – Segundu Komandante Jerál Polísia Nasionál Timor-Leste (PNTL), Faustino da Costa, kinta ne’e relata atuasaun membru PNTL ba Prezidente Repúblika (PR), Francisco Guterres Lú Olo.

Ema númeru rua iha PNTL ne’e levanta kazu oknum PNTL baku sobrevivente Masakre 12 Novembru 1991, Andre Rangel, iha salaun Delta Nova, Komoro, semana kotuk, nomós kazu agresaun fízika hasosu komunidade iha Bairru Pité, foin lalais, hosi membru PNTL balun.

“Prosesu tantu disiplinár no krime ba atuasaun ne’e la’o hela, katak, PNTL hasai ona despasu para loke prosesu ba kazu sira ne’e”, Faustino ba jornalista sira iha Palásiu Prezidente Nicolau Lobato, Bairru Pité, hafoin soru-mutu.

Aleinde ne’e, nia mós hato ba Prezidente Repúblika kona-ba ema balun soe bebé iha fatin lixu no rekorda katak kazu hanesan ne’e ful-fulan sempre akontese (iha agustu nia laran kazu ne’e akontese dala rua ona. Ida iha Becora no ida seluk iha Markoni).

“Kazu sira ne’e ita prosesa hela, katak, PNTL lori ona bebé sira ne’e hodi submete ba autopsia iha ospitál nasionál para bele hatene katak bebé ne’e moris mai mate kedas, ka moris maibé ema balun maka hamete sira”, Faustino esklarese.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here