Xefe-Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur

DILI, (TATOLI)-Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur husu ba joven eh estudante sira atu valoriza no banati eroi saudozu Nicolau dos Reis Lobato inklui saudozu sira seluk ho estuda no lee barak.

Majór Jenerál Lere Anan Timur hateten ida ne’e, tanba tuir Lere, Saudozu Nicolau Lobato lider rezisténsia ida tanba ne’e, ita tenke valoriza nafatin ba oin.

Estatua saudozu Nicolau Lobato iha ona, se ita tau de’it sira-nia estatua, ita la sama tuir sira-nia ain fatin, estatua ne’e la vale buat ida.

“Se saudozu Nicolau Lobato nia estatua hatuur iha ne’ebá, hakarak estuda, hakarak lee, ema ne’ebá ne’e hakarak konsensu, ema ne’ebá hakarak buat loos. Entaun, ita mós tenke tuir ida ne’e,” konsidera Lere perante jornalista iha Kampus Liceu-Díli, ohin, sai oradór ba semináriu ho tema Lideransa Nicolau iha Luta Armada.

Kona-ba restu mortál saudozu nian ne’ebé mak seidauk hetan to’o ohin loron, Majór Jenerál Lere Anan Timur hateten katak sira mate ona, importante mak ita valoriza no tane nafatin sira-nia ne’ebé moris ne’e.

“Semináriu sira hanesan ne’e ita valoriza sira-nia mate, sira-nia ruin. Mas, agora sira ne’ebé sei moris ne’e mós sira sente sira-nia isin-lolon; terus, susar. Problema oioin ne’ebé mak sira enfrenta lorloron; problema morál, psikolójika, problema familiár,” hateten lider másimu forsa armada ne’e.

“Sira ne’ebé mate ita hakoi ba, sira ne’ebé moris ita tau-matan. Sira ne’ebé mate, ita agora valoriza sira-nia mate,” reforsa tan Xefe Estadu Maior F-FDTL, Majór Jenerál Lere Anan Timur.

Diretora Ezekutiva Movimentu Letras, Maria Silvia dos Reis Lopes, organizadora no partisipante ida mós, hafoin semináriu ne’e, ba jornalista sira haktuir katak iha eventu ne’e ko’alia kona-ba oinsa Nicolau Lobato nia moris, luta povu maubere nian no oinsa Nicolau Lobato nia polítika no espiritu luta nian durante funu inklui previzaun ba Timor nia futuru.

“Ita jerasaun foun ne’e banati tuir ninia (Nicolau Lobato) espiritu hodi luta liliu luta atu liberta povu ne’e husi ki’ak. Ida ne’e mak ohin foka liu ba ida ne’e katak ita manan ona funu, ukun aan ona, maibé ita tenke luta hodi halakon ki’ak iha ita-nia rain,” dehan alumni komunikasaun STIKOM (Sekolah Tinggi Ilmu Komunikasi), Indonézia ne’e.

Partisipante ba semináriu ho tema jerál Nicolau Lobato no Kultura Luta Povu Maubere, hodi selebra loron internasionál literásia ne’e, partisipa husi públiku enjerál, estudante Universidade Nasionál Timor Lorosa’e (UNTL) no ISFIT (Institutu Superiór Filozofia no Teolojia).

Oradór sira mak, alende Majór Jenerál Lere Anan Timur inklui mós profesór filozofia étika no Polítika Padre Martinho Gusmão nomós eis-embaixadór Timor-Leste ba Moçambique, Roque Rodriguês.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here