Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur.Foto António Goncalves

DILI, (TATOLI)—Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur preokupa membru F-FDTL sira ne’ebé hetan agregasaun, seidauk hetan prosesu.

“Ha’u mós preokupa. Ha’u-nia ema sira be taa iha 2014, prosesu até agora la iha. Baku iha Tibar, taa iha Becora ne’ebá mós, ohin loron ne’e la hatene,” preokupa Majór Jenerál Lere Anan Timur ba jornalista sira iha Kampus Liceu, ohin.

Xefe Estadu Maior F-FDTL, konsidera katak ema sempre kestiona bainhira mak membru F-FDTL ne’ebé deskonfia envolve insidente tiroteiu iha Maliana-Bobonaru, enkuantu Eis-ministra Finansa, Emília Pires halai ba rai li’ur ema la protesta.

“Kazu Maliana, ami taka matan karik problema. Mas, prosesu ne’e ha’u hateten beibeik, prosesu la’o daudauk. Prosesu ne’e la’o neineik,” informa Majór Jenerál Lere Anan Timur.

Nia dehan tan, se porezemplu, kazu balun iha tribunál, la’o ona tinan tolu, tinan haat ema la protesta.

“Emilia be halai ba tasi balun ne’ebá, ema la protesta. Agora, ha’u nian (membru F-FDTL-red) ne’e mak ema hateten, bainhira-bainhira?. Bainhira ne’e sei presiza tempu,” Majór Jenerál Lere Anan Timur esplika.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here