Vise-Ministru Saúde Bonifácio Maukoli dos Reis. Foto António Goncalves

Dili,(TATOLI) –  Vise Ministru Saúde, Bonifácio Maukoli dos Reis ba Ajénsia Tatoli, ohin iha Parlamentu Nasionál, informa governu liuhosi Ministériu Saúde sei aloka orsamentu milaun U$ 2.4 hodi selu dívida hirak ne’ebé durante ne’e Timor-Leste halo ho óspital sira iha rai liur.

“Osan ne’ebé atu selu dívida mak hamutuk milaun U$ 2.4. hosi osan hirak ne’e ajuda ita konklui ona tusan ne’ebé durante ne’e Estadu halo ho óspital sira iha nasaun tolu” esplika nia.

Nia afirma katak osan ho montante milaun U$ 2.4 tenke selu duni ba tusan ne’ebé durante Timor-Leste halo ho óspital Indonezia, Singapura no Malaisya liliu selu ba kustu ka tratamentu ne’ebé sira fó atendimentu ba pasiénte Timoroan sira.

Enkuantu osan atu selu dívida ne’e hetan aprovasaun hosi Parlamentu Nasionál (PN) iha debate espesialidade liuhosi orsamentu transferénsia públika ho montante milaun U$ 12.

Entretantu, orsamentu Ministériu Saúde hetan ona apresiasaun ho aprovasaun hosi uma fuku ho valór milaun U$ 42.7 ne’ebé fahe ba kategoria saláriu no vensimentu, bem serviru, kapitál menór no trasferénsia públika.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here