Sekretáriu Estadu Ambiente, Demétrio de Amaral de Carvalho. Foto/Gabinete SEA.

DILI, (TATOLI) – Sekretáriu Estadu Ambiente, Demétrio de Amaral de Carvalho, hatete iha 2019 sei implementa polítika zero plástiku, nune’e bandu atu importa no uza saku plástiku iha atividade tranzasaun loja sira-nian.

“Ita implementa zero plástiku ne’e gradualmente iha 2019, ita sei 100% aplika moratóriu ba uza saku plástiku”, Demétrio afirma ohin, iha Bebora.

Sekretáriu Estadu ne’e subliña iha Timor-Leste dadus hatudu loron ida lixu ne’ebé so’e iha Tibar ne’e porsentu 18 fo’er husi plástiku nian de’it.

“Ho ida ne’e ita bele redús 18% (lixu plástiku) ne’e, entaun empreza sira kontente loos, ami halo intervensaun ida ne’e poupansa boot ba sira, poupansa ne’e bele fó signifikativu tebes ba sira 1.5 to’o dois milhões dólares americanos poupansa ba setór privadu sira ne’ebé loke loja, supermerkadu, mini market sira ne’e”, katak.

Nune’e merkadu ida millaun rua ne’e ba saku alternativu sira, saku sira ne’ebé bele dodok lalais iha natureza, bote, kohe, bornál, saku suratahan sira, saku biodegradavel mai husi ai-farina kulit sira ne’e hotu bele halo aproveitamentu iha Dili de’it, millaun rua no iha Timór laran tomak bele entre millaun tolu hanesan ne’e.

Eis deputadu ne’e dehan lixu plástiku ne’e la’ós dodok iha fulan tolu ka fulan haat hanesan ai-tahan ka ai-sanak sira ne’ebé so’e ba rai, entaun sei okupa espasu ne’e aumenta ba beibeik.

“Tanba ne’e ameasa ba lixu plástiku ne’e buat ida reál ba ita. Ha’u ko’alia beibeik, sé ita la kuidadu halo jestaun ba lixu plástiku ne’e loron ruma la’ós iha Timór de’it, iha mundu tomak, iha tasi la’ós ikan mak barak liu, lixu maka sei barak liu”, nia dehan.

Nune’e saida maka presiza atu halo iha Timor-Leste hodi redús plástiku maka muda ema nia estilu konsome, tanba produsaun lixu boot liu ida mak saku plástiku no mai husi botir bee sira.

“Entaun ita halo intervensaun iha Dili, Timór laran hahú halo ona prosesu atu implementa polítika zero plástiku liuliu foku ba saku plástiku”.

Demétrio espera ho serbisu sira ne’e hotu bele halo mudansa no promete sei embarga projetu pilotu iha tempu badak.

“Iha ativista sira ne’ebé halo serbisu hanesan sensibilizadór ambientál sei serbisu hamutuk ho suku ida ka rua hodi hamenus problema lixu”.

Hatutan sobre lixu ne’ebé fakar iha Tibar presiza mellora tratamentu no halo prosedimentu no tenke  minimiza poluisaun.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here