Prezidente Repúblika, Francisco Guterres Lú Olo

DILI, (TATOLI) – Prezidente Repúblika, Francisco Guterres Lú Olo, dirije mensajen saudasaun no felisitasaun ba Fundasaun Klibur Domin ba esforsu no kapasidade hodi ultrapasa dezafiu sira ba tempu tinan 18 nia laran, hodi hala’o tratamentu médiku, kuda pás no domin ne’ebé di’ak.

“Naran ida “Klibur Domin” fó lembra ita hotu beibeik ba domin, oinsá hamutuk atu fó asisténsia saúde ba sosiedade”, Xefe Estadu felisita Fundasaun refere liuhusi komunikadu imprensa ne’ebé Tatoli asesu hosi Mídia Prezidénsia Repúblika, kuarta ne’e, relasiona Fundasaun Klibur nia aniversáriu ba dala 18 ne’ebé monu iha loron ohin.

Tuir Prezidente nia haree Fundasaun ne’e halo esforsu kapasitasaun téknika ba nia kuadru sira atu bele atende vulnerável sira ho profisionalizmu, respeitu no domin no nia mós satisfeitu boot, tanba Fundasaun fasilita domisiliáriu ba ema moras sira, serbisu móvel hodi halo prevensaun ba ema moras sira iha área remota.

“Ho apoiu reforsadu hosi Ministériu Saúde, Ministériu Solidariedade Sosiál, Fundu Globál, Fundasaun Ryder Chesire hosi Austrália, voluntáriu sira nasionál no internasionál, ha’u fiar katak Fundasaun ida ne’e sei presta serbisu asisténsia médika ida ne’ebé di’ak liu ba ema ne’ebé moras tuberkoluse (TBC), defisiénsia no idozu sira”, Lú Olo haklaken.

Prezidente Repúblika hein katak ema sira ne’ebé simu asisténsia médiku hosi Fundasaun ne’e bele hetan rekoperasaun lalais, nune’e kontribui matenek (sabedoria) ba dezenvolvimentu rai doben ida ne’e.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here