Serimónia “Asinatura Condolence Book“. Foto TATOLI: Rafy Belo

DILI, (TATOLI) – Governu Timor-Leste (TL), liuhusi Ministériu Negósiu Estranjeiru no Kooperasaun (MNEK) organiza serimónia “Asinatura Condolence Book“ ka asinatura livru kondolénsia hodi fó rekoñesimentu ba kontribuisaun saudozu Kofi Anna nian iha prosesu luta TL nian ba indepedénsia.

Diretór jerál protokolu no asuntu protokolár, Juvêncio de Jesus Martins, hatete MNEK organiza eventu ne’e hodi konvida organizasaun internasionál, komunidade diplomátika rezidente iha Dili hodi halo asinatura livru ne’e hodi fó omenajen ba saudozu Kofi Annan ne’ebé husik ona mundu.

“Jestu ida ne’e ita halo nu’udar rekoñesimentu ida ne’ebé mak ita povu timoroan, governu no estadu timoroan hatudu ba ita-nia saudozu Kofi Annan”, Juvêncio de Jesus Martins ba jornalista sira iha MNEK, ohin.

Nia hatutan: “Tanba nia hahalok ne’ebé mak di’ak, nia halo ona iha luta ba libertasaun ita nian iha prosesu hothotu buka solusaun ba Timor nian”.

Nia konsidera saudozu Kofi Annan ne’e ema ida kalmu, diplomata ida ho alta kualidade, nia hatene bainhira mak nia bele ko’alia, bainhira mak nia atu interven.

Saudozu ajuda barak Timor-Leste iha prosesu Timor-Leste nian hodi to’o iha 1999. La’ós ne’e de’it maibé mós kria UNAMET (United Nation Administration in East Timor), UNTAET (United Nation Transition Administration in East Timor) no UNMISET (United Nation Mission in East Timor). Parte sira ne’e hotu la sees husi kontribuisaun saudozu Kofi Annan, diplomata seniór Ghana ne’e.

“Tanba ne’e ita povu Timor, ita-nia lisan, ita-nia kultura, ita foti nia sai ‘maun ida, aman ida’ ne’ebé mak fó ona nia enerjia tomak, nia hanoin tomak, ninia dedikasaun tomak hodi trata, rezolve ita-nia problema iha Timor”, katak Juvêncio de Jesus Martins.

Diretór ne’e mós afirma “Asinatura Condolence Book“ sei loke durante semana ida, la’ós de’it iha MNEK maibé mós iha Palásiu Governu no Parlamentu.

“Ita hotu tuir ita-nia kultura, ita-nia lisan, agredese ema nia hahalok di’ak mai ita”, akresenta.

Nia hatutan tan funerál sekretáriu jerál Nasaun Unida sesante, saudozu Kofi Annan nian, estadu TL fó fiar no reprezenta husi diplomata seniór, José Ramos Horta, hodi asiste.

“Purtantu ita povu Timor kontente, tanba molok nia mate mós, ita bele goza indepedénsia. Mai ita hamutuk hatudu ita-nia omenajen ba saudozu Kofi Annan”, sujere.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here