Ministra Finansa em ezersisiu, Sara Lobo Brites. Foto António Goncalves

DILI (TATOLI) – Ministra Finansas em ezersísiu, Sara Lobo Brites informa Ministériu Finansas (MF) agora daudauk enfrenta situasaun difisil tanba servidor ne’ebé ministériu nia kuaze nakonu ona.

Servidor ne’e utiliza hodi atende servisu públiku hanesan sistema Free Balance ne’ebé uza ba pagamentu finansas públikas, Asycuda World ba alfándega no Sitgas ba impostu.

“Proposta redusaun ba kapitál menór, iha ne’e ami aloka $689.000, durante rejime duodésimu suspende. Tanba ne’e, durante períodu duodésimu ami preokupa tebes, sei karik espasu servidor ne’ebé mak iha falta porsentu 10.”

“Ida ne’e mak utiliza hotu sistema bele paraliza ou kolaps derrepente tanba  laiha ona espasu atu tau dadus”, Ministra ne’e informa ba deputadu sira ne’ebé preokupa ho montante osan ne’ebé aloka ba ekipamentu informátika iha MF, iha biban debate proposta Orsamentu Jerál Estadu (OJE) 2018 espesialidade iha plenária segunda ne’e.

Governante ne’e esplika, liu-liu sistema Free Balance ba pagamentu ba finansas públika ne’ebé mak agora daudauk ita desentraliza hotu iha 47 ajénsia públika autónomu no ida-idak prosesu sira nia pagamentu ho utentes ba sistema ne’e hamutuk 1600 resin.

“Sei sira asessu rasik ba sistema ne’e sira halo sistema nia servidor laiha espasu atu akomoda ona dadus hotu-hotu”, tenik.

Tanba  ne’e, Ministra ne’e konsidera kestaun ne’e urjénsia tebes ba MF atu prevee osan ba ekipamentu informátiku sira hodi bele hatán ba preokupasaun hirak ne’e.

Entretantu deputadu Antoninho Bianco no Adriano do Nascimento aprezenta proposta ho númeru 52, iha kategoria kapitál menór ba item ekipamentu informátika ne’ebé dotasaun inisiál $689.000, proposta alterasaun $300.000 ho dotasaun final $389.000,

Justifikasaun ba proposta ne’e iha OJE 2018 MF husu tan osan $600.000 atu tau iha rubrika ekipamentu informátika, maibé seidauk hetan esplikasaun konaba utilizasaun montante osan ne’e.

Maski nune’e Proposta ne’e proponente sira ikus mai retira ho tanba esplikasaun hosi parte governu nian.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here