Votasaun iha jeneralidade Orsamentu Jerál Estadu 2018. Imajen António Goncalves

DILI, (TATOLI) – Iha diskusaun dotasaun governu iha tersa (4/9), deputadu proponente sira aprezenta proposta ida (12), hodi aumenta orsamentu ne’ebé preve sosa transformadór tolu no mákina kontadór prepagu hamutuk unidade 30.000 no ikus mai proposta ne’e pasa ho votu a favór 47, kontra rua no abstensaun 15.

Entretantu proposta 12, orgaun iha Ministériu Obras Públikas (MOP), kategoria despeza kapitál menór ne’ebé dotasaun inisiál $250.000, propoin aditamentu ho valór $500.000, ho dotasaun finál $750.000. Retira husi rezerva kontijénsia ne’ebé valor inisiál milliaun $22,437, ho redusaun $500.000, ho dotasaun finál milliaun $21,937.

Deputadu Abel Pires husi bankada PLP ne’ebé hanesan proponente argumenta, proposta alterasaun ne’e, tanba orsamentu ne’ebé preve la to’o.

Nia haktuir iha sub estasaun hanesan Kamea funsiona sein iha mákina rezerva, fulan hirak liuba akontese blackout (ahi mate total) besik loron ida tomak.

“Iha kondisaun rua atu akontese blackout, laiha kombustível ou kuandu mákina avaria”.

Nia informa transformadór tolu ne’ebé atu sosa, rua ba sub estasaun Kamea no ida ba rezerva territóriu tomak, nune’e bele prevene situasaun ne’ebé ita hotu lakoi akontese.

Kona-ba kontadór prepagu, tuir nia importante tanba agora dadauk kliente Eletrisidede de Timor-Leste (EDTL) nain 30.000 mak seidauk halo instalasaun prepagu, liu-liu sei aloka ba kompañia sira ne’ebé boot sira ne’ebé uza enerjia barak para mákina bele deteta kuandu iha ligasaun ilegál ruma no ba kliente sira iha área rural ne’ebé uza enerjia kiik, parese la presiza uza mákina ho kapasidade ne’e maibé ba negósiu boot sira tenke monta atu bele hasa’e reseita iha área ida ne’e.

Antes ne’e bainhira halo audiénsia públika ho komisaun E, Ministru Obras Públikas, Salvador Soares Dos Reis Pires, informa governu iha planu atu instala kontadór prepagu Automatic Meter Reading (AMR).

Hodi nia dehan vantajem uza kontadór prepagu AMR mak fásil identifika koneksaun ilegál hodi hola asaun imediata. Se kompara ho sistema prepagu ida agora, kuandu kliente la hola pulsa liu fulan tolu mak foin deteta katak uma kain ne’e la sosa pulsa.

Nune’e mós sistema ne’e diak tanba kria dashboard ida iha EDTL no bainhira iha bypass, tékniku sira bele deteta direitamente.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here