Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, (TATOLI) – Prezidente Parlamentu Nasionál (PPN), Arão Noé, tendensiozu liu ba Bankada Aliansa Mudansa ba Progresu (AMP), la imparsiál hodi fó tempu hanesan ba deputadu sira atu halo intervensaun iha debate Orsamentu Jerál Estadu (OJE) 2018.

Maibé ! Primeiru Ministru (PM), Taur Matan Ruak, ema lider ne’ebé akumulativu no hatene jere konflitu, la’ós hanesan PPN.

PM hatene ezerse nia papél ne’ebé di’ak, ho kalma, la orgullu ba nia maioria, maibé simu krítika.

Lia hirak ne’e hato’o hosi Deputadu Partidu Demokrátiku (PD), Adriano do Nascimento nu’udar opozisaun iha Parlamentu Nasionál, ba Ajénsia TATOLI, iha Parlamentu, ohin.

“Prezidente defende liu parte Bankada AMP, ida ne’e la di’ak, ka Prezidente tendensiozu ba AMP durante debate orsamentu,” Adriano do Nascimento lamenta.

Nia kompara PPN, Arão Noé ho Eis-PPN Saudozu Fernando La sama de Araújo deferénsia tebes. Atuál PPN la iha espíritu atu akumula bankada AMP ho opozisaun, enkuantu Saudozu La sama nia tempu iha situasaun manas, maibé nia hakuak hotu Frente Revolusionáriu Timor-Leste Independente (Fretilín).

Tuir nia, PPN nia papél la’ós atu jere maioria parlamentár, la’ós atu jere parlamentu de’it, nia figura númeru rua hodi jere nasaun. Oinsá mak lider másimu PPN atu fasilita parte hotu mezmu iha diverjénsia polítika.

“Saudozu La sama nia tempu ami fó hanoin ba malu katak kuandu Fretilín hato’o ideia tenke akomoda atu ita rezolve problema ne’ebé ita frekuente,” Vice Prezidente Bankada PD ne’e konta tuir.

Hodi afirma bainhira PPN la akomoda ba oin sei susar, ezemplu depois de diskusaun Orsamentu Jerál Estadu sei hili Komisáriu Komisaun Anti Korrupsaun (CAC-Sigla Portugés), enkuantu Prezidente Repúblika veta, karik pelu menus opozisaun ida tenke akumuladu hodi rezolve, ou mantein parte ida.

Enkuantu, prosesu votasaun, opozisaun sira koopera fó votu afavor iha jeneralidade tanba haree ba konsensu polítika ba kestaun interese nasionál nian. Maibé iha diskusaun espesialidade hahú mosu fali opozisaun parte ida no bankada governu parte seluk. Ida ne’e mak demokrasia, maibé tenke limita hodi sensibiliza espíritu opozisaun ne’ebé kooperativa hodi vota afavor.

Nune’e, akontese mak kestaun sensibilidade polítika hosi opozisaun sira  nian hatudu di’ak, maibé bankada AMP ignora fali ka kontra tanba sira iha sentimentu orgullu maioria.

“Sira ignora de’it ka vota kontra tanba iha sentimentu orgullu tanba sira maioria. Maibé iha mós limitasaun, ezemplu; atu hili Komisaun Anti Korrupsaun (CAC-Sigla Portugés) presiza opozisaun, sé opozisaun la ba Komisaun KAK la iha, enkuantu Prezidente Repúblika veta,” akresenta tan.

Hatán ba proposta hosi opozisaun nia la liu, nia dehan, opozisaun loke dalan hodi fó apoiu iha jeneralidade, entaun pelu menus sira bele fasilita proposta opozisaun nian atu bele konsidera, mas la akontese.

“Ida ne’e mak demokrasia, maibé polítika iha parlamentu ne’e mak taka dalan ba malu mak opozisaun sei taka fali sorin,“ lider PD ne’e subliña.

Iha fatin hanesan, Deputada opozisaun hosi Fretilín, Maria Angelica, akresenta mós, PPN durante debate OJE tau an hanesan fali Prezidente AMP, ida ne’e la di’ak.

“Prezidente Parlamentu durante ne’e la halo balansu atu fó intervensaun ba deputadu sira. Durante ne’e akontese duni mai ami, maibé ida ne’e mós direitu prezidente parlamentu nian,” Deputada ne’e haktuir.

Entretantu, tuir nia opozisaun la’ós atu vota kontra de’it, maibé fó alternativu hodi fó sujestaun atu labele gasta osan arbiru ka labele gasta despeza deznesesáriu.

“Ami nafatin kritika, maibé hodi fó kontribuisaun, ami nia votu ho konxiénsia, hatudu ba kada liña ministeriál sira katak orsamentu ne’e los duni, ami vota afavor, se lae ami vota kontra,” Nia argumenta

Hodi espresa tan katak, nia arrepende los bainhira opozisaun halo proposta atu apoiu organizasaun rezisténsia nian, maibé ikus mai la konsege pasa.

“Oinsá mak ita bele fahe rikusoin hanesan ka lema hosi Partidu Libertasaun Populár (PLP) nian,” Maria Angelica arrepende.

Maski nune’e reprezentante deputadu opozisaun na’in rua ne’e observa katak, Primeiru Ministru, Taur Matan Ruak nia prezensa iha parlamentu nasionál iha ámbitu Debate OJE 2018, konsidera ema lider ne’ebé akumulativu no hatene jere konflitu, la’ós hanesan PPN.

Deputadu Adriano haree, Primeiru Ministru ezerse nia papél ne’ebé di’ak, ho kalma, la orgullu ba nia maioria, maibé simu krítika.

“Primeiru ministru nia lideransa di’ak tanba la’ós foin mak lider, maibé nia lider nanis,” Deputadu ne’e gaba tan.

Too notísia ne’e tun parte tatoli sei halo tentativa atu halo konfirmasaun ba  PPN, Arão Noé ho Primeiru Ministru, Taur Matan Ruak.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here