Prezidente IPJ, Helio Casemiro Guterres (klaran), bainhira ko’alia ba jornalista sira iha Palásiu Prezidente Nicolau Lobato.

DILI, (TATOLI) – Reprezentante Institutu Petróleu no Jeolójia (IPJ) hala’o enkontru ho Prezidente Repúblika, Francisco Guterres Lú Olo, hodi ko’alia kona-ba saida maka institutu halo durante ne’e nomós konvida Xefe Estadu atu bele loke konferénsia ne’ebé institutu sei realiza iha 23 outubru tinan ne’e.

“Konferénsia ida ne’e instituisaun halo tinan rua dala ida atu resposta ba misaun prinsipál institutu nian maka desiminasaun informasaun rekursu jeolójiku (rekursu minerais) no petrolíferu ne’ebé maka institutu halo”, Prezidente IPJ, Helio Casemiro Guterres, ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin hala’o soru-mutu ho Xefe Estadu.

Nia esplika buat ne’ebé hakerek iha Lei Orgánika IPJ katak ezisténsia IPJ maka atu halo estudu ba rikusoin minerál sira, petróleu, bee, bee-manas inklui risku jeolójiku.

Helio haktuir iha kosta súl, hahú kedas hosi Suai to’o iha Iralalaru (Lospalos), iha evidénsia okurénsia rekursu petrolíferu hanesan gas no óliu, tanba ne’e maka ho apoiu hosi Sestu Governu Konstitusionál aprova programa atu halo estudu detallu ka estudu ne’ebé uza aviaun hodi leno ba tasi okos atu hatene rekursu iha ne’ebé.

“Tuir institutu nia haree katak rekursu iha tasi laran sei iha no hosi estudu siénsia nian hatudu katak mina sei la hotu”, nia informa.

Iha rai maran, Helio tenik, buat ne’ebé IPJ deteta ona maka iha manganes, mármer, kalkáriu (fatuk ne’ebé atu produs sai simentu, kaulin (fatuk mutin ne’ebé bele produs ba bikan fatuk, kopu, estátua no ajuleiju) no krómiu (materiál ne’ebé bele produs sai fiu no batria ba nesesidade eletróniku).

Iha biban ne’e, Prezidente Repúblika fó apresiasaun no enkoraza joven jeólogu sira atu kontinua halo estudu, la’ós de’it ba rikusoin maibé ba risku sira ne’ebé maka iha hanesan rai nakadoko no rai halai.

Institutu Petróleu no Jeolójiku harii iha tinan 2012 ne’ebé tutela ba Ministériu Petróleu no Rekursu Minerais.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here