Votasaun iha jeneralidade Orsamentu Jerál Estadu 2018. Imajen António Goncalves

DILI (TATOLI) – Parlamentu Nasionál (PN), liuhosi votasaun Orsamentu Jerál Estadu (OJE) 2018 faze espesialidade iha plenária segunda (3/9), aprova ona orsamentu ba Ministériu Reforma Lejizlativa no Asuntus Parlamentares (MRLAP) inklui Sekretáriu Estadu Komunikasaun Sosiál (SEKOMS) hamutuk millaun $4,214, ho rezultadu votasaun a favor 39, kontra 3 no abstensaun 21.

Orsamentu MRLAP inklui SEKOMS, saláriu no vensimentu millaun $1,075, bens no servisu millaun $1,532, transferénsia públika millaun $1,557, kapitál menór $50.000, ho total despeza millaun $4,214.

Enkuantu MRLAP esklui SEKOMS, saláriu no vensimentu $220.000, bens no servisu $861.000, kapitál menór $50.000, ho total despeza millaun $1,131.

Orsamentu ba SEKOMS rasik, saláriu no vensimentu $885.000, bens no servisu $671.000, transferénsia públika millaun $1,557, ho total despeza millaun $3,083.

Husi orsamentu MRLAP inklui SEKOMS hetan proposta ida (númeru 56 ba SEKOMS) husi deputadu Antoninho Bianco no deputadu Adriano do Nascimento, maski ikus mai proposta ne’e la-pasa ho rezultadu afavor 22, kontra 35, no abstensaun 7.

Konteúdu husi proposta ne’e, hanesan proposta redusaun iha gabinete SEKOMS ba kategoria bens no servisu (servisu profisionál sira), ne’ebé ho montante inisiál $153.000, proposta alterasaun $63.000, ho dotasaun final $90.000.

Montante osan $153.000 ne’ebé aloka iha rubrika ne’e, deputadu proponent sira la hetan informasaun detalhus no tempu efetivu atu halo servisu ne’ebé fulan tolu de’it, tanba ne’e propoin atu halo redusaun.

Deputadu Antoninho Bianco konsidera tempu badak nia laran sei la prodúz lei ruma, tanba elaborasaun orsamentu bain-bain la presiza assessor, tanba  tékniku sira preparadu atu halo elaborasaun.

Hatán ba kestaun ne’e, Sekretáriu Estadu Komunikasaun Sosiál, Merício Juvenal Akara informa, total orsamentu millaun $3,083 ba SEKOMS atu kobre tinan tomak.

“Orsamentu mak ami propoin ba tinan ida, husi Janeiru to’o Agostu millaun $2 resin mak ezekuta ona, hela de’it millaun $1 mak ami atu uza iha Setembru to’o Dezembru”, tenik.

Liga ba proposta númeru 56, orsamentu ne’ebé mak atu uza bens no servisu, ida ne’e SEKOMS atu uza atu selu funsionáriu kontratadu sira ne’ebé mak governu antes ne’e rekruta, assessor no tékniku professional sira.

Biban hanesan, PN mós aprova orsamentu ba Ministériu Finansas (MF) ho montante millaun $13,059, ho rezultadu votasaun a favor 45, kontra 0 no abstensaun 19. Husi orsamentu ne’e iha proposta haat (númeru 54,55,53,52), ne’ebé proposta 54 no 55 la passa enkuantu proposta 53 no 52 retira. Proposta haat ne’e mai husi deputadu Antoninho Bianco no deputadu Adriano do Nascimento.

Husi orsamentu MF, ba saláriu no vensimentu millaun $3,883, bens no servisu millaun $8,486, kapitál menór $689.000, ho total despeza millaun $13,059.

Proposta 54, ne’ebé iha diresaun jerál servisu kooperativu unidade finanseira, kategoria bens no servisu iha item manutensaun ekipamentu no edifísiu sia ne’ebé dotasaun inisiál millaun $1,424, alterasaun ou redusaun  millaun $1,424 ho dotasaun finál 0.

Proposta 55, iha kategoria bens no servisu, rúbrika servisu profisionál sira ne’ebé dotasaun inisiál millaun $2,457, alterasaun millaun $1,457 ho dotasaun finál millaun $1.

Proposta 53, iha kategoria bens servisu no item servisu divérsu seluk, ne’ebé dotasaun inisiál millaun $1,052, alterasaun $400.000 ho dotasaun finál $652.000.

Proposta 52, iha kategoria capital menór, item ekipamentu informátika ne’ebé dotasaun inisiál $689.00, alterasaun millaun $30.000 ho dotasaun finál millaun $389.000.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here