Deputadu sira halo votasaun iha diskusaun espesialidade Orsamentu Jerál Estadu (OJE) 20018 iha uma fukun Parlamentu Nasionál. Imajen António Goncalves

DILI, (TATOLI) – Orsamentu ba Ministériu Estadu Prezidénsia Konsellu Ministru (MEPKM) ho montante milliaun $3,635 pasa ho votu a favór 41, kontra 0 no absten 19, liuhusi diskusaun espesialidade iha plenária Parlamentu Nasionál, segunda ne’e.

Verba ne’e atu selu rekorrente sira ne’ebé kobre item tolu maka saláriu no vensimentu, bens serbisu no transferénsia públika ho valór milliaun $2,635 nomós aloka ba kapitál minór ho montante miliaun $1.

Entretantu, deputadu proponente alterasaun orsamentu ba MEPKM, Antoninho Bianco, dúvida ho ezekusaun orsamentu ba ministériu relevante, liu-liu iha item kapitál minór ninian, tanba atu halo manutensaun ruma la presiza lori osan boot to’o miliaun $1, maibé ho de’it mil $100 mós bele sufisiente ona.

“Ha’u labele simu no ha’u sei buka hatene ezekusaun orsamentu nia lala’ok to’o iha ne’ebé liuhusi fiskalizasaun”, argumenta.

Alende ne’e, deputadu Joaquim dos Santos nu’udar proponente alterasaun orsamentu ba MEPKM afirma parlamentu la divia autoriza miliaun $1 iha item kapitál minór atu gasta iha fulan tolu nia laran, tanba ne’e ezajeradu.

“Ne’e kontra espíritu Primeiru-Ministru ninian atu halo poupansa. Ne’e duni ha’u husu ba deputadu sira atu tau sees diferensa sira para tama iha polítika poupansa. Se iha nesesidade boot balun ne’ebé presiza osan, ita rezerva ba orsamentu 2019 nian no diskute halo didi’ak maka foin aprova”, katak tan.

Entretantu, Ministru Estadu Prezidénsia Konsellu Ministru, Agio Pereira, hateten orsamentu ne’e (miliaun $1) la’ós MEPKM nian maibé tau iha MEPKM atu sentraliza resposta ba nesesidade ministériu foun sira nian hanesan Ministériu asuntu Antigu Kombatente Libertasaun Nasionál, Ministériu Ensinu Superiór, sosa ambulánsia rua ba Rejiaun Autonomia Espesiál Oekusi Ambeno no sira seluk tan.

“Ha’u agradese ba deputadu Antoninho Bianco, tanba nia reiteira ninia vontade ka inkansável atu halo fiskalizasaun ba orsamentu ne’e”, tenik.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here