Xefe Bankada Partidu Demokrátiku, António da Conceicão. Imajen António Goncalves

DILI, (TATOLI)-Prezidente husi bankada Partidu Demokrátiku (PD), António da Conceição, husu klarifikasaun Sekretáriu Estadu Kooperativa (SEK), Arsénio da Silva Pereira, ne’ebé seidauk asina kontratu funsionáriu kazuál sira.

“Ha’u tenke dehan ha’u-nia fuan monu ba Primeiru-Ministru nia liafuan, labele hasai paun husi labarik sira-nia liman. Ha’u preokupa de’it iha Sekretáriu Estadu agora daudauk la asina kontratu ba sira seluk ne’ebé agora kontratadu iha ne’ebá”, António hatete ohin, iha Parlamentu Nasionál iha ámbitu dikusaun OJE 2018 iha espesialidade.

Aleinde ne’e deputadu Adriano Nascimento hatete tanba osan seidauk iha ne’e mak seidauk asina, maibé nia hein SEK bele asina. “Mas se polítika ida atu hasai kontratadu ne’e mós ita-boot sira-nia polítika”, katak.

Sekretáriu Estadu Kooperativa (Sek), Arsénio Pereira, hatán ba kestaun ne’e katak to’o ohin loron seidauk asina kontratu tanba antes tama iha Governu Daualuk, diretór jerál sira halo ona sorumutuk bazea ba termu sertu ho lei kontratadu sira ne’ebé hatete iha 30 juñu kontratu hotu termina.

“Signifika katak ne’e la’ós ba iha Oitavu Governu nia problema, maibé Governu anteriór nia problema. Hanesan Sekretáriu Estadu ha’u iha inisiativa konvida Komisaun Funsaun Públika halo esklaresimentu ba funsionáriu kontratadu bazea ba termu sertu no iha enkontru ho diresaun sira iha karta ida hatete kuandu lamai ona signifika lakontinua, tanba hatene katak atu kontrata ema bazea ba nesesidade”, nia esplika.

Tanba SEK seidauk implementa programa ne’ebé seidauk iha nesesidade ba kontatadu sira, tanba ne’e la asina kontratu.

“Depois sira konvida fali kontratadu sira mai serbisu ne’ebé ha’u lahatene, diresaun nasionál sira halo kontratu ho sira depois haruka ha’u aprova. Ida ne’e mós ha’u la’ós husik de’it, maibé ha’u husu pareser husi legál sira ne’ebé hatete diretór ne’e halo abuzu podér tanba ha’u nein hatene nia bá halo tiha kontratu depois mai tau ha’u-nia meza haruka ha’u halo aprovasaun. Tanba ne’e mak to’o ohin loron ha’u la asina kontratu ida ne’e”.

Iha parte seluk eis Ministru Komérsiu no Indústria, António dehan SEK akumula prinsípiu Governu kontinuidade.

“Ema sira ne’e lamonu tun husi lalehan mai iha tempu ida de’it, sira ne’e transferidu husi tempu ida ministériu eziste”.

Jornalista : Maria Auxiliadora  

Editór : Manuel Pinto

HAKEREK NO HATÁN

Please enter your comment!
Please enter your name here