Deputada AMP sira Vota iha Plenaria PN

DILI (TATOLI) – Parlamentu Nasionál (PN), liuhosi votasaun Orsamentu Jerál Estadu (OJE) 2018 faze espesialidade iha plenária sesta (31/08), aprova ona orsamentu Millaun $5,718 ba Primeiru-Ministru (PM) ho votu a favor 52, kontra 0, abstensaun 9.

“Ho rezultadu ne’e orsamentu ba Gabinete Primeiru-Ministru pasa”, tenik Prezidente Parlamentu Nasionál (PPN), Arão Noe.

Sekretária Meza, Maria Teresinha informa orsamentu gabinete Primeiru Ministru, iha proposta rua ne’ebé deputadu proponente sira aprezenta (proposta númeru 46 no 76).

Entretantu, despeza ba Saláriu no Vensimentu $217.000, Bens Servisu millaun $1,991, Transferénsia Públikas millaun $3,510, ho totál despeza ba PM hamutuk millaun $5,718.

Proposta númeru 76 ne’ebé aprezenta husi deputadu Antoninho Bianco no deputadu Adriano do Nascimento, hanesan proposta iliminasaun ne’ebé ikus mai deputadu proponente sira retira. Hanesan ba Diresaun Jerál Diretór Jerál, Gabinete Apoiu Sosiedade Sivíl husi rubrika Transferénsia Públika ho total dotasaun inisiál millaun $3,510, proposta alterasaun ou redusaun millaun $2, nune’e dotasaun finál millaun $1,510.

Tuir deputadu proponente sira, proposta redusaun ho razaun, iha OJE 2017 la prevee osan iha kategoria Transferénsia, maibé agora OJE 2018, PM halo proposta alokasaun osan ho montante millaun $3,510, tanba ne’e iha biban diskusaun husu atu klarifika ba deputadu/a no povu sira konaba utilizasaun rubrika refere.

Enkuantu Proposta númeru 46 ne’ebé aprezenta husi deputadu António da Conceição, deputada Maria Angélica Rangel no deputadu Joaquim dos Santos, ikus mai konsege halo votasaun maibé la pasa, ho rezultadu afavor 28, kontra 32 no abstensaun 2.

Proposta ne’e dotasaun ba governu hotu, ba kategoria Bens Servisu ne’ebé dotasaun inisiál millaun $42,437 ho alterasaun ou redusaun millaun $1,500, nune’e dotasaun finál millaun $20,937. Propoin halo transferénsia ba instituisaun PM, Gabinete Apóiu Sosiedade Sivíl iha kategoria despezas Transferénsia Públika ne’ebé dotasaun inisiál millaun $3,510, ho alteresaun ou aditamentu millaun $1,500, nune’e dotasaun finál ba kategoria ne’e millaun $5,010.

Prezidente PN antes ne’e esplika, proposta rua 46 no 76 ba kategoria hanesan, sei proposta 46 liu, proposta 76 prejudikadu, maibé sei proposta 46 la-liu, ida 76 ita diskute, tanba sira iha ligasaun ba malu.

Primeiru-Ministru (PM), Taur Matan Ruak hateten nia parte apoiu idéias deputadu/a sira nian konaba oinsá atu tau matan ba organizasaun ne’ebé mak iha.

“Atu hahú halo ida ne’e, ha’u nia hanoin ajuda lai ami deside polítika klaru ida para ema labele akuza governu, dehan ami favorese parte ida, tanba ne’e presiza define kritériu klaru no ajuda halo ezersísiu ida ne’e atu tinan 2019 ita bele tau”, Primeiru Ministru promete.

Hodi hatutan, orsamentu ne’ebé aloka agora daudauk, barak liu apoia konfisaun relijioza sira ne’ebé presiza halo konstrusaun

Ministra Finansas ezersísiu Sara Lobo Brites reforsa ba kategoria Transferénsia Públika, ninia ezekusaun atuál aloka millaun $3,510, maibé iha rejime duodésimu gasta ona millaun $1,876, no agora restu millaun $1,644.

“Sekarik atu hamenus entaun sei iha défisit ida ba despeza ne’e no ultrapasa ba despeza ne’ebé ita aloka”. Nia esplika

Ba kategoria Bens Servisu, ninia alokasaun ne’ebé mak governu propoin millaun $1,991 mas nia ezekusaun atuál millaun $1,139 no agora saldo iha $852.000.

“Hakarak reforsa, proposta rua ne’ebé aprezenta hanesan alvu ba fundu kontinjénsia ne’ebé iha alokasaun orsamentu millaun $22,4 hanesan fundu ne’ebé atu gasta ou lae sei fila ba konta estadu no laiha obrigasaun atu gasta, maibé ezekusaun atuál iha rejime duodésimu ita gasta ona millaun $8,6 no agora daudauk saldo falta millaun $13,8”, nia informa.

Governante ne’e hatutan, millaun $13,8 iha proposta aditamentu balun ne’ebé hakarak aumenta iha rejime kontributivu hamutuk millaun $5,6, entaun sei hamenus, falta millaun $7,9 ne’ebé mak sei restu husi rezerva fundu kontijénsia.

“Lolos ida ne’e seidauk deside iha Konsellu Ministru, maibé tinan-tinan ita deside halo saláriu 13 ba funsionáriu sira, no funsionamentu husi despeza sira ne’e sempre mai husi fundu kontinjénsia, tanba ne’e sei fundu ne’e mínimu governu defísil deside”, katak tan.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here