DILI, (TATOLI) – Diretór Ezekutivu Laboratóriu Enjiñeiru Nasionál ba TV Dijitál, Richard Zhang, ho nia ekipa téknika akompañadu husi Konselleiru Ekonómiku Embaixada Xina, Liliu Zheng Hua, atualiza apoiu dijitalizasaun Rádiu no Televizaun Timor-Leste (RTTL-Ep) ba Sekretáriu Estadu Komunikasaun Sosiál (SEKOMS), iha Palásiu Governu, ohin.
Sekretáriu Estadu Komunikasaun Sosiál, Merício Juvinal dos Reis Akara, hatete ekipa sira ne’e sei hala’o serbisu durante semana tolu iha Timor-Leste (TL) hanesan vizita RTTL-Ep, haree no avalia torre sira no kestaun tékniku sira seluk tan.
“Sira bolu hanesan investigasaun kle’an kona-ba problema tékniku sira hotu para depois halo reportajen ida mai ita bazea ba agreement (akordu) ne’ebé mak ita asina ona ho governu Xina atu halo dijitalizasaun sistema RTTL”, katak Merício Akara ba jornalista sira hafoin sorumutu.
Ekipa téknika sira ne’e atu halo duni serbisu para depois halo reportajen finál no tuir mai bazea ba reportajen ne’e, TL ho Xina sei finaliza akordu.
“Tuir planu tinan oin, juñu hanesan ne’e projetu hahú. Maibé dadaun ekipa tékniku mai, sinál katak prosesu dijitalizasaun hahú”, katak tan.
“Dala ida tan públiku presiza hatene katak governu Timór mak halo pedidu ba governu Xina atu dijitaliza ita-nia sistema iha RTTL. Entaun, governu Xina simu ita-nia pedidu”, tenik.
Akordu ne’e halo iha governasaun anteriór, SEKOMS atuál mai no kontinua de’it hodi implementa akordu relasiona ho pedidu TL ba dijitalizasaun sistema iha RTTL-Ep.
“Ita iha kompromisu atu implementa. Ita mak halo pedidu i governu Xina apoiu”, afirma.
Orsamentu finansia husi Xina tuir akordu no TL apoia no fasilita sira-nia ekipa ne’ebé hala’o serbisu iha ne’e.
“Tuir akordu ne’e sira prontu, tanba sira mak sei ajuda sistema dijitalizasaun. Ita apoiu tékniku, purezemplu, oinsá sasan sira mai atu instala ne’e labele selu taxa, ita fasilita sira-nia ekipa ne’ebé serbisu iha ne’e, seguransa, para sira avontade halo sira-nia serbisu”, katak tan.
Hafoin hasoru malu ho SEKOMS, Liliu Zhen Hua, Konselleiru Komersiál husi Embaixada Xina iha TL perante profisionál komunikasaun sosiál sira dehan, enkontru ne’e atualiza informasaun kona-ba apoiu ne’ebé Xina oferese.
“Ekipa téknika Xineza mai hasoru malu ho SEKOMS ko’alia atu oinsá para bele fasilita timoroan hotu atu bele asesu informasaun didi’ak”, haktuir Liliu Zhen Hua.
Nia akresenta razaun ne’e sira mai hodi ajuda TL, inkluzivamente estasaun televiziva públika, RTTL-Ep.
“Ikus mai kuandu projetu ne’e finaliza ho didi’ak iha Timor-Leste, sei asesu informasaun husi RTTL di’ak liutan, bele hetan kanál ida ne’ebé kapás. Timoroan sira hotu sei asesu informasaun husi RTTL ho moos no di’ak”.
Jornalista: Rafy Belo
Editora: Rita Almeida
