TL Simbolikamente Entrega Xeke ho Valór Rihun 750 ba RI

0
173
TL Entrega Xeke ba RI. Foto: TATOLI

DÍLI, (TATOLI)-Governu Timor-Leste (TL), simbolikamente liuhusi Ministériu Negósiu Estranjeiru no Kooperasaun (MNEK) entrega xeke ho valór rihun 750 ba Repúblika Indonézia (RI), nu’udar asaun solidariedade no umanidade. Nune’e, RI ho laran luak no respeitu agradese tebes apoiu ne’ebé TL oferese.

“Ami hato’o obrigadu wa’in ho fuan ne’ebé kle’an ba simpátia no solidaridade husi governu Timor-Leste, ne’ebé hato’o ba povu Indonézia tanba impaktu husi dezastre iha Lombok,” agredese reprezentante embaixadór RI iha TL, Novita Supit ba jornalista sira iha MNEK, Praia dos Coqueiros, Díli, ohin.

“Solidaridade ida ne’e, kona-ba tebes ami-nia fuan no ami simu ho fuan laran tomak no sentimentu respeitu,” espresa tan sekretária daruak, Novita Supit hodi reprezenta embaixadór RI, Sahat Sitorus.

Diretór Asuntu Sudeste Aziátiku no Oseania, MNEK, Lisualdo Gaspar hateten, tuir desizaun Konsellu Ministru nian, governu Timor-Leste fó apoiu umanitáriu ba vítima rai nakdoko iha Lombok, hanesan ita-nia asaun solidaridade ba povu Lombok, governu Indonézia, para apoiu sira ne’ebé mak hetan dezastre iha 29 jullu, liubá.

“Ohin, ministériu negósiu estranjeiru nia naran simbolikamente entrega xeke ne’e ba reprezentante governu Indonézia nian iha ne’e. Prosesu tuir mai MNEK sei koordena ho Ministériu Finansa (MF) atu osan sira ne’e bele halo transferénsia tuir kanál, prosesu babain ne’ebé la’o iha Timor-Leste, ho montante 750.000 USD,” informa diretór Asuntu Sudeste Aziátiku no Oseania, MNEK, Lisualdo Gaspar.

Antes ne’e, Ministru Estadu Prezidénsia Konsellu Ministru, Agio Pereira esplika rezolusaun ne’ebé governu aprova hanesan apoiu finanseiru ho karakter umanitáriu.

“Konsellu Ministru aprova rezolusaun rua, ida atu fó apoiu finanseiru ho karakter umanitáriu ba rai nakdoko iha Lombok, Repúblika Indonézia ho vítima barak no aprova mós  rezolusaun apoiu finanseira nu’udar membru ONU, atu responde ba apoiu internasionál ne’ebé governu Laos halo ba komunidade internasionál,” Agio Pereira esplika ba jornalista sira.

Notísia relevante, klik; http://www.tatoli.tl/2018/08/tl-apoia-osan-ba-povu-indonezia-ho-laos/

Jornalista: Rafy Belo

Editór : Manuel Pinto

HUSIK IDA HATÁN