TL Sei Espresa Pozisaun Kona-ba Kombate Tráfiku

0
55
Ilustrasaun

DILI, (TATOLI) – Governu Timor-Leste (TL) sei espresa nia pozisaun kona-ba oinsa hadi’a liña koordenasaun hodi kombate tráfiku umanu iha eventu konferénsia interministeriál iha Bali, Indonézia, ne’ebé organiza husi governu Indonézia no Austrália. Eventu ne’e, hahú ohin no ramata aban, (07/08).

“Ministru sei espresa Timor-Leste nia pozisaun kona-ba oinsa hadi’a liña koordenasaun hodi kombate tráfiku umanu no haforsa estratejía prioridade sira seluk”, haktuir komunikadu Ministériu Negósiu Estranjeiru no Kooperasaun (MNEK) diriji mai TATOLI, ohin.

Tuir komunikadu ne’e enkontru sétimu ba Bali Prosesa, Konferénsia Ministeriál no enkontru ba Seniór Ofisiál sira ne’e atu hadi’a liña koordenasaun di’ak liutan entre estadu membru hodi harii mekanizmu konsultasaun.

Enkontru ida ne’e fó vantajen boot ba nasaun membru sira liliu ba Timor-Leste atu reafirma kompromisu Timor-Leste nian hodi prevene no kombate atividade ilegál sira entre nasaun viziñu sira hanesan Indonézia no Australía.

Enkontru ne’e mós fó oportunidade di’ak ba Timor-Leste hato’o ninia comitment hodi kombate tráfiku umanu no atividade ilegál sira seluk ne’ebé fó ameasa ba dezenvolvimentu país membru sira.

Entretantu, objetivu hosi enkontru Sétimu Bali Prosesu, Konferénsia Ministeriál no Sénior Ofisiál sira iha Bali ne’e atu halo konsultasaun ho parte interesadu sira hodi prevene no kombate atividade ilegál sira hanesan, tráfiku umanu, kontrabandu pesoál no krime transnasionál sira relasiona no kria grupu nasionál traballu ida para ultrapasa situasaun ne’e.

“Iha eventu ne’e, xefe diplomata mós sei halo enkontru bilaterál ho nia omologu sira ne’ebé partisipa mós iha eventu refere,” haktuir tan komunikadu MNEK nian.

Enkontru sétimu Bali Prosesu, Konferénsia Ministėrial no enkontru ba sénior ofisiál kona-ba Tráfiku Umanu, Tráfiku Pesoál no Krime Transnasionáis ho sira seluk ne’e, dala ida tan, organiza husi governu Indonezia no Australía.

Ministru Negósiu Estranjeiru no Kooperasaun, Dionísio Babo Soares, tuir sei partisipa mós iha eventu ne’e. Membru delegasaun ne’ebé akompaña, Ministru-MNEK iha eventu ne’e kompostu hosi ministériu no instituisaun relevante mak hanesan, Ministério Justisa, Diresaun Jerál Servisu Imigrasaun no Seitor Privadu.

Nasaun ne’ebé partisipa iha eventu ne’e kompostu hosi nasaun 45, inklui Organizasaun Nasaun Unidas tolu hanesan IOM (Organizasaun Internasionál Monetáriu), ILO (Organizasaun Internasionál Traballu) no UNODC (Eskritóriu Nasaun Unida Kona-ba Drogas no Krime). Timor-Leste partisipa iha fórum rejionál ne’e dezde tinan 2003.

Jornalista: Rafy Belo

HUSIK IDA HATÁN