DILI, (TATOLI) – Semana oin, Komisaun Investigasaun Konjunta (KIK) sei hato’o relatóriu ba komandu FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) ligadu ba kazu insidente entre oknum F-FDTL no PNTL ne’ebé akontese iha 4 agustu liu-ba iha Maliana, munisípiu Bobonaru.
Xefe-Estadu FALINTIL-Forsa Defeza Timor-Leste (FALINTIL), Majór Jenerál Lere Anan Timur, deklara asuntu ne’e ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin relata ba Prezidente-Repúblika, Francisco Guterres Lú Olo, kona-ba kazu Maliana.
Hafoin relatóriu to’o iha liman, Lere tenik komandu rua sei túr hamutuk halo análiza katak se ligadu ba kestaun disiplinár, komandu F-FDTL nia kompeténsia atu toma desizaun no ligadu ba kriminál, tenke kanaliza ba tribunál atu toma desizaun.
“Ha’u husu ba komunidade no husu ba polítiku-sira atu lalika ansi. Timor ne’e ita-nian ona. Entaun, ita-nia uma laran ita rezolve ho kalma para ita rezolve buat sira ne’e ho didi’ak”, apela.
Jenerál fitun rua hatutan kuandu kazu ne’e to’o ona iha konkluzaun, komandu rua sei dezloka ba Maliana atu hato’o diskulpa ba komunidade ne’ebé sei trauma hela ho akontesementu refere.
Jornalista: Xisto Freitas
Editora: Rita Almeida
