Sekjer g7+ “Briefing” MNEK Hodi Projeta Imajen Timor-Leste Ba Mundu

0
149
Sekretáriu Jerál (Sekjer) g7+, Helder Da Costa. Foto: g7+

DILI, (TATOLI) – Sekretáriu Jerál (Sekjer) g7+, Helder Da Costa, ohin hasoru Ministru Negosiu Estranjeiru no Kooperaun, Díonisio Babo Soares, hodi partilla progresu programa no atividade g7+, nune’e bele projeta imajen Timor-Leste ba mundu.

g7+ hanesan programa ne’ebé konstitui iha governu da-ualu konstitusionál, liuliu halai ba polítika eksterna maka oinsá TL bele adere ba organizasaun hosi nasaun sira iha sudeste aziátika (ASEAN-sigla inglés) no relasaun ho komunidade nasaun sira ne’ebé ko’alia lian-portugés (CPLP-sigla portugés) inklui konsolida g7+.

Sorumutu ne’e importante, molok ministru marka prejensa iha Asembleia Jerál Nasaun Unida, Nova Iorke.

“Tanba ne’e mak ohin ami mai, hasoru sua exelénsia Ministru Negósiu Estranjeiru, nune’e hametin liutan ita-nia kuotasaun hodi projeta imajen Timor-Leste ninian iha mundu. Tanba ita hotu hatene katak dadaun iha mundu kompleksu”, dehan Sekretáriu jerál g7+, Helder da Costa, ba jornalista sira iha  MNEK, Praia dos Coqueiros, ohin.

Nia hatutan tan: ”País barak mak agora derepente tama iha frajilidade. Ita Timor-Leste nu’udar pioneiru, fundadór g7+, iha esperiénsia barak atu partilla ho país sira seluk, ida ne’e sei sai hanesan barometru susesu”.

Helder da Costa hateten sorumutu ne’e hanesan preparasaun. “Tanba ne’e mak ministru responde pozitivamente hodi partisipa iha reuniaun altu nível ida ne’e, nune’e mós sei hein delegasaun husi Timor nian, sujeitu ba prezensa Prezidente Repúblika, prosesu sei la’o hela”, haktuir.

Reprejentante nasaun membru hamutuk 193 sei partisipa no halo diskursu iha enkontru ne’ebé akontese kada tinan, iha fulan-setembru nia-laran.

Entretantu g7+ ne’e eventu boot ida ne’ebé bolu paralelu altu nível kona-ba ekonómiku reziliense, liuliu atu hakat ba reziliense sira ne’e.

Tanba ne’e atu halibur nasaun sira postu konflitu, tuur hamutuk partilla esperiénsia, prepara án para bele tama iha high level polítical forum  (forum polítika nível altu nian) ba tinan oin.

Tinan oin mai, iha Nova Iorke sei ko’alia kona-ba implementasaun objetivu númeru 16, liliu ba ajenda 2030, iha ODS (Objetivu Dezenvolvimentu Sustentável) katak pás, justisa no instituisaun efikaz.

Jornalista: Rafy Belo

Editora: Rita Almeida

HUSIK IDA HATÁN