Prezidente Autoridade RAEOA Tenke Kontinua Hala’o knaar Tuir Mandatu

0
89
Konferénsia imprensa hosi Movimentu Sidadania Atoni Oekusi Timor-Leste (MSOTL). Foto FB Sazi Correia Haksoit

OEKUSI, (TATOLI) – Portavos Movimentu Sidadania Atoni Oekusi Timor-Leste (MSOTL), Luis Armando Pina, hatete povu atoni Oekusi fó fiar no apoiu ba Prezidente autoridade Rejiaun Administrativa Espesiál Oekusi Ambenu (RAEOA) no Zona Espesiál Ekonomia Sosiál Merkadu Timor-Leste (ZEESM-TL), Marí Alkatiri atu kontinua hala’o servisu tuir mandatu lei nian, iha númeru 3/2014, 18 jullu, artigu 22 ho pontu G, ne’ebé fó kompeténsia ba Prezidente autoridade “Para nomear e exonerar os cargos da administração publica da região.”

“Povu atoni Oekusi husu nafatin ba Dr. Marí Bim Amude Alkatiri atu hala’o nia knaar nu’udar prezidente Autoridade RAEOA-ZEESM TL, tanba nia mandatu seidauk hotu”, sujere Portavóz MSOTL ba jornalista sira liuhosi konferénsia imprensa iha Oekusi, ohin.

Nia haklaken povu Oekusi rejeita totalmente ba lamentasaun grupu veteranu sira no estrutura Aliansa Mudansa ba Progressu (AMP) ho nia aliadu sira iha RAEOA ne’ebé propoen hodi suspende kargu Prezidente autoridade, Marí Alkatiri, ho razaun Prezidente autoridade simu nomeasaun ka konfiansa hosi Estadu Timor-Leste ne’ebé hetan posse iha 2014 hosi atuál Primeiru Ministru, Taur Matan Ruak, momentu ne’eba nu’udar Prezidente RDTL.

Nune’e husu ba Xefe Governu atuál atu responsabiliza prezensa Dr. Marí Alkatiri ba komunidade Oekusi.

Enkuantu, Marí Alkatiri kontinua nafatin servisu, tanba mandatu ladauk termina bazea ba lei nú 3/2014 ne’ebé aprova ho unanimidade hosi orgaun Parlamentu Nasionál  iha lejislativa datoluk no hetan promulgasaun hosi Prezidente, Taur Matan Ruak, momentu ne’eba.

Nune’e, povu Oekusi husu nafatin ba Prezidente Autoridade atu hala’o nafatin servisu hodi dezenvolve rai enklave nu’udar ezemplu ba Timor tomak.

Alende ne’e, MSAOTL hamutuk ho feto faluk, oan kiak FALINTIL RAEOA husu Estadu ho orgaun kompetente atu halo prosesu investigasaun ba veteranu sira iha rejiaun ne’e, tanba barak mak falsifika dokumentu hodi sai veteranu ba libertasaun nasionál.

Portavóz ne’e hatutan eis-membru komisaun omenajen Oekusi durante ne’e halo falsifikasaun dokumentu hodi hasa’e grau ho razaun tama prizaun tinan haat to’o sia no detensaun preventiva inklui inventa kargu estrutura orgaun rezisténsia nian hodi bele simu osan veteranu kada fulan.

“Veteranu sira iha Oekusi barak mak falsifika dokumentu hodi bele tama grau ualu to’o 14”, lamenta portavóz.

Eis-Membru komisaun omenajen ne’ebé durante ne’e konsidera sai autór hodi falsifika dokumentu, portavós ne’e temi Martinho da Cunha, João Tabes, Andre Lao, Xisto de Sousa, Cipriano da Cunha, Antonio Lafu, Ximão da Xavier Alias Xavier da Costa, Luis Neno no Antonio da Conceição.

Tanba ne’e, husu ba autoridade RAEOA atu fasilita dokumentu nesesáriu ba Ministériu Públiku hodi halo investigasaun hodi autór sira bele ba hatan iha justisa.

Nia afirma hodi halo deklarasaun, tanba hosi koligasaun Aliansa Mudansa ba Progressu (AMP) ho grupu veteranu sira Oekusi ne’ebé hala’o iha kinta, 9 Agostu liu-ba sira hanaran veteranu maibé nunka apoiu Governu, só protestu de’it durante Timor-Leste ukun-án, hanesan sira halo protestu hasoru prejensa administradór tempu UNTAET no Primeiru Governu Timor-Leste, Françisco Marques, prezensa Sekretáriu Estadu Rejiaun Oekusi, Albano Salem, prejensa Sekretáriu Rejiaun Oekusi, Jorge Teme, Administradór Oekusi, José Tanesib Anuno no Administradór Oekusi, Salvadór da Cruz.

Entretantu, Eis-Primeiru Sekretáriu oomisaun omenajen, Antonio da Conceição, hatan ba deklarasaun ne’ebé fó sai hosi MSOTL konsidera veteranu sira iha Oekusi barak mak falsu, nia dehan lakohi fó komentáriu ba asuntu ne’e.

Jornalista: Zezito Silva

Editora: Rita Almeida

HUSIK IDA HATÁN