Povu Nafatin Hakmatek, Fó Fiar Ba Ita-Nia Lider Sira

0
101
Bispo Dioseze Díli, Dom. Virgílio do Carmo da Silva, SDB. Foto: Dioseze Díli

DÍLI, (TATOLI)-Bispu Dioseze Díli, Dom Virgílio do Carmo Guterres husu povu atu nafatin hakmatek hodi akompaña situasaun polítika rai laran.

Husu povu atu fó fiar nafatin ba ita-nia lider sira rezolve liuhusi tau kbiit hamutuk atu bele buka nafatin povu nia hakarak, povu nia di’ak no povu nia moris di’ak.

“Hanoin katak ida ne’e mak buat ne’ebé ita fó hanoin ba sira (lider) i husu nafatin ita hotu kontinua, iha povu nia parte, kontinua mantein ita-nia situasaun ne’ebé kalma, hodi akompaña, fó fiar nafatin ba sira,” Dom Virgílio do Carmo husu perante media iha Rezidénsia Episkopál, Díli, ohin.

“Segundu, ita husu nafatin sira-nia parte atu tane aas nafatin povu nia interese,” Bispu Dioseze Díli, Dom Virgílio do Carmo Guterres husu tan.

Bispu Dioseze Díli ne’e hateten, durante ne’e ita hotu akompaña ita-nia situasaun polítika; tempu ruma ita hotu dada iis duni, maibé to’o momentu ne’e ita haree katak la’ós dehan aat liu kedas maibé ita haree iha esperansa.

Ita iha esperansa katak iha Parlamentu, ita-nia programa komesa liu, povu hotu, barak komesa dada iis oi tuan, ida ne’e bele fó liután esperansa ba povu atu hakmatek. Konfiansa ne’ebé ita-nia povu sira tau ona ba iha ita-nia polítiku sira hodi bele lori ba oin di’ak liután.

Ne’e duni, tuir bispu, ita kontinua fó fiar ba ita-nia polítiku sira mezmu dala ruma ita dada iis, hodi akompaña situasaun polítika, maibé ita haree katak neineik maibé la’o ba oin nafatin. Ita mós fó apoiu nafatin, ita povu nafatin hakmatek.

“Dala ruma ita hakilar; lalais, lalais! Ne’e la’ós mákina, maibé ita ema, dala ruma hanoin la hanesan, koñesimentu la hanesan, polítika la hanesan maibé sira buka oinsá tau sira-nia forsa hamutuk,” akresenta Bispu Dom Virgílio do Carmo hodi konklui.

Jornalista: Rafy Belo

Editór : Manuel Pinto

HUSIK IDA HATÁN