PN Fó Votu Pezar Ba Kofi Annan Ho Unanimidade

0
60
Eis Sekretáriu Jerál ONU, Kofi Anan. Foto espesiál

DILI, (TATOLI) – Parlamentu Nasionál (PN), liuhosi votasaun iha sesaun plenária estraordinária, fó votu pezar ba Kofi Annan ho votu unanimidade husi deputadu 53 ne’ebé marka prejensa.

Antes ne’e, Prezidente Parlamentu Nasionál (PPN), Arão Noe, hateten Timor-Leste lakon ona figura importante hanesan Kofi Annan, ne’ebé kontribui iha prosesu libertasaun to’o foti desizaun ne’ebé determinante.

“Timor-Leste  lakon figura ne’ebé importante tebes iha prosesu hakotu luta naruk liuhosi referendum, tanba ne’e hanesan reprezentante Timor iha uma fukun, ami sente lakon lider internasionál ida ne’ebé foti desizaun ne’ebé determinante tebes hodi Timor avansa ba referendum no hetan ukun rasik-án”, tenik.

Xefe Bankada FRETILIN, Aniceto Guterres, hateten Kofi Annan marese duni hetan omenajen husi povu Timor-Leste, maibé hato’o de’it sentidu kondolénsia ba família la to’o, sei Sérgio Viera de Melo ita bele tau nia naran ba toponímia, tamba saida Kofi Annan ita la bele halo nune’e.

“Aproveita oportunidade ida ne’e ha’u hakarak husu ba Governu atu haree estrada ruma ne’ebé bele tau Kofi Annan nia naran hanesan sinal omenajen husi povu Timor-Leste nian, ida ne’e hanesan ha’u nia proposta ba Governu, para la halo de’it rezolusaun ida ba sentidu kondolénsia, maibé tau sinál ida katak Kofi Annan nia kontribuisaun ba povu Timor-Leste ba luta  independénsia ne’e boot tebes no determinante”, dehan.

Kona-ba sujestaun ne’e, PPN Arão Noe, hateten kuandu plenária konkorda, husi meza bele manda karta ba Primeiru-Ministru, Taur Matan Ruak, hodi Governu bele toma konsiderasaun.

Jornalista: Julia Chatarina

Editora: Rita Almeida

HUSIK IDA HATÁN